Эквадор ҳукумати уюшган жиноятчиликка қарши кураш чораларини кучайтиради

Эквадор президенти Даниэл Нобоа овозларнинг 13 фоизи ҳисоблаб чиқилгач, уюшган жиноятчиликка қарши чораларни кучайтириш бўйича ўтказилган референдумда ғалаба қозонганини эълон қилди. «Биз мамлакатни ҳимоя қилдик, энди жиноятчиликка қарши курашиш ва Эквадор оилаларига тинчлик ўрнатиш учун кўпроқ ресурсларимиз бор», — деб ёзди Нобоа 21 апрел, якшанба куни Instagram саҳифасида.

Референдум иштирокчиларидан ҳукуматнинг армия ва полиция ваколатларини кенгайтириш, ўқотар қуроллар устидан назоратни кучайтириш ва жиноят содир этган уюшган гуруҳлар аъзоларига нисбатан жазони қатъийлаштириш ташаббусига ўз муносабатини билдириш сўралган. Ҳукумат томонидан таклиф этилаётган чора-тадбирлар қаторига ҳарбий-полиция қўшма патрул хизматини жорий этиш, қидирувда бўлган жиноятчиларни экстрадиция қилиш, терроризм, қотиллик ва бошқа жиноятлар учун қамоқ жазосини узайтириш киради. 

Эквадорда жиноий зўравонлик 

Овоз бериш вақтида расмийлар Эквадор ғарбидаги Манаби провинциясида қамоқхоналардан бирининг директори ҳалок бўлганини ва Лос-Риос провинциясидаги қамоқхоналардан бирида тартибсизлик уюштиришга уриниш бўлганини тасдиқлади. 18 миллион аҳолиси бўлган Лотин Америкаси давлати жиноий зўравонлик ва наркотик картелларининг таъсиридан азият чекмоқда. Биргина мамлакат қамоқхоналарида ички низолар оқибатида юзлаб маҳбуслар ҳалок бўлган. 

Январь ойида кучли «Лос Чонерос» тўдаси раҳбари, наркобарон Адолфо Маcиас қамоқдан қочиб кетганидан сўнг, Нобоа «ички қуролли можаро» туфайли фавқулодда ҳолат ва комендантлик соати эълон қилди. Ўша ойда юзига ниқоб тақиб олган шахслар жонли эфирда TC Televisión давлат телевидениесига бостириб кириб, бир неча журналист ва ходимларни гаровга олди.