CNN бошловчиси АҚШ мадҳиясини Францияники билан адаштириб юборди

Фото: Washington Examiner

Американинг CNN телеканали бошловчиси Поппи Харлоу АҚШ мадҳиясини Францияники билан адаштириб юборди, деб хабар бермоқда Fox News. Жонли эфирда АҚШ президенти Дональд Трамп ва унинг франциялик ҳамкасби Эммануэль Макроннинг Париждаги учрашувини шарҳлар экан, журналист аёл телетомошабинларга Франция мадҳиясини тинглашни таклиф қилган. Бироқ, бу пайтда АҚШ мадҳияси янграётган бўлган.

- Келинг Франция мадҳиясини бироз эшитамиз, - деди Харлоу ва жим бўлиб қолди, бир неча сония ўтиб эса ўз хатосини тўғирлашга шошилди. – АҚШ мадҳияси, Америка миллий мадҳияси, демоқчи эдим. Келинг тинглаймиз.

Ҳодисадан дарғазаб бўлган Fox News телеканали бошловчиларининг таъкидлашича, Харлоу кадр ортида кимдир унга хатосини шивирлаб айтганидан сўнг буни пайқаган. Шунингдек, улар CNN’ни "фейк янгиликлар"ни тарқатишда айблашди.