Японияда саримсоқдан қаҳва олиш рецепти ўйлаб топилди

Япониядаги кафелардан бирининг эгаси саримсоқдан қаҳва таъмли ичимлик олиш рецептини яратди. Бу ҳақда Japan Today нашри хабар бермоқда.

74 ёшли пазанданинг айтишича, бундай фикр унга 30 йил аввал келган. У эътиборсизлиги ва ресторанда мижозлар жуда кўплиги сабабли гўшт бўлагини саримсоқли қайлада меъёридан ортиқ қовуриб юборган. Шунда у қорайиб кетган саримсоқни қошиқ билан эзғилаб, уни қайноқ сувда эритган. Ҳосил бўлган "ичимлик" эса қаҳва таъмини эслатиб юборган, фақат бироз аччиқроқ бўлган. 

Шундан кейин Симотаи исмли бу шахс ўз ихтиросини эсдаб чиқариб юборган ва у пенсияга чиққачгина у устида ишлашга қайтган.

Ҳозир япониялик оддий қаҳва каби дамланадиган янчилган саримсоқ ишлаб чиқаришни йўлга қўйган. Саримсоқли қаҳвани тайёрлаш учун саримсоқ қовуриб олинади ва сўнгра совутилади ва янчилади. Японияликнинг айтишича, саримсоқ қовурилиши эвазига ҳеч қандай нохуш таъм бўлмайди.    

"Мен яратган ичимлик эҳтимол дунёда биринчи бундай ичимлик бўлса керак. Унда заррача кофеин моддаси йўқ ва уни қаҳвани хуш кўрувчилар уйқулари бузилишидан хавотирланмай, тунги вақт ичишлари мумкин. Бу антиқа қаҳва ҳомиладорлик вақтида ўз рационларидан қаҳвани истисно қилишни афзал кўрувчи аёллар учун ҳам мос келади", деб айтмоқда тадбиркор.

Таъкидлаш жоизки, олимларнинг тахминича, 2050 йилга келиб қаҳванинг йўқ бўлиб кетиш эҳтимоли мавжуд.