Москва вилоятида ўлдирилган Достон Адехонов ўз юрти Фарғонада дафн этилади

Москва вилоятида мижоз томондан ўлдирилган 24 ёшли ўзбекистонлик сартарош йигит Достон Адехоновнинг жасади 17 октябрда она юрти Фарғонага олиб келинади. Маълумотларга кўра, йигитнинг жасадини юртига жўнатиш учун кўнгилли тарзда пул йиғилган. 

Ўзга юртда Дани номини олган Достон Москва вилоятидаги сартарошхоналардан бирида ишлаган. Таъкидланишича, унинг оиласи ночор ҳолда яшайди. У бир йил аввал ўзга юртга кўпроқ пул топиш илинжида кетган эди. Оилада ягона фарзанд бўлган йигит топган пулининг деярли ҳаммасини ота-онасига улар Фарғона чеккасидаги икки хонали квартираларини таъмирлай олишлари мақсадида жўнатган.

Достон 13 октябрда бир кун аввал унга соч олдиргани келган мижоз томондан куппа-кундузи гувоҳлар кўз ўнгида ўлдирилди. Қотил Достон олган соч турмаги унга ёқмагани важи билан марҳумнинг юрагига аввалдан тайёрлаб қўйган кабоб сиҳи билан уч марта зарба берган. Достон олинган жароҳатлардан вафот этган.

Таъкидланишича, йигитнинг онаси яккаю-ягона фарзандининг ўлганидан бехабар, унга ўғли жонлантириш бўлимида эканлигини айтишган.

Достоннинг таниши Ойбекнинг айтишича, йигитнинг онаси яқинда инсультни бошдан кечирган. Отаси ҳам касалманд. "Мен улар ҳаётларидаги энг қадрли бўлган инсонларини йўқотганларидан кейин қандай яшай олишади, билмайман. Мен унинг отаси билан ўтирганимда у ўғлининг ўлдирилиши видеосини ҳали кўрмаганини айтди. Бу сўзлардан кейин мен ўзимни ёмон ҳис қила бошладим", деб айтмоқда Ойбек.

Достон ўзга юртда ўз касбининг устаси эканлиги билан мижозлар ҳурматини қозонган эди. Достондан миннатдор мижозлар унинг жасадини юртига жўнатиш учун пул йиғишни йўлга қўйишди. Шунингдек, Facebook’да ҳам марҳумнинг оиласи учун пул йиғиш ташкиллаштирилди.

"Бу воқеага бефарқ бўлмаган барчага пул йиғишда иштирок этишни таклиф қиламан. Йигит Ал-Хоразмий кўчасидаги Охунбобоев массивида яшаган. Достоннинг отаси исми Рустам ака. Биродарлар, Достоннинг оиласи кам таъминланган, шунинг учун сизнинг ҳар қандай кўмагингиз керак! Достон эртага кечки рейс билан Москвадан олиб келинади. Ҳозирча шу... Маблағ йиғиш билан Наталья Валерьевна шуғулланмоқда", деб ёзган фойдаланувчилардан бири ижтимоий тармоқда. 

Маълум қилинишича, Достонни 17 октябрда кечки вақт дафн қилиш режалаштирилмоқда.  

Достоннинг ўлдирилиши кузатув камералари томондан қайд қилинган. Қотил жиноятни содир этган куннинг ўзида вилоятни тарк этмоқчи бўлганда полиция томондан қўлга олинган.