Улар учун барчаси муҳайё. Энг кўп маош олувчи ТОП-10 футболчи

Каталониянинг «Барселона» клуби ҳужумчиси Лионель Месси клуб билан тузган амалдаги шартномасини 2021 йилга қадар узайтирди. Натижада у яна дунёнинг энг кўп маош олувчи футболчилар рейтингида етакчи бўлиб олди.

Tribuna.Uz ақлбовар қилмас миқдорда маош оладиган футболчилар рўйхатини тузиб чиқди. Қуйида энг бой 10 нафар футболчи билан танишиб олиш мумкин. Аҳамиятли томони, рейтингнинг ярми Хитой чемпионатида тўп сурадиган футболчилардан иборат.

10. Грациано Пелле

Клуби: «Шандун Лунэнг», Хитой
Йиллик маоши: 15 миллион евро
Амалдаги шартномаси: 30 декабр, 2018 йилгача
Роналд Куман Нидерландия чемпионатидан «Саутҳемптон»га олиб келган италиялик савия борасидаги камтар ҳужумчи қисқа вақтда Англияда ҳам ўзини кўрсата олди. Лекин Пелленинг порлаб чиқиш 30 ёшдан кейин содир бўлди. Футбол оммасига кеч танилган футболчига кутилмаганда Хитойдан «ёғли» таклиф тушди. Нидерландияда оладиган маошидан қарийб 20 баравар юқори маош учун у шундоқ ҳам сўроқ остида бўлган келажагини алмаштириб юборди. Бугунги кунда Пелле Италия терма жамоасидан умуман таклиф олаётгани йўқ, аммо Хитойда ярим куч билан ўйнаб ҳам ойига миллион евродан ортиқроқ ишлаб топмоқда.

9. Поль Погба

Клуби: «Манчестер Юнайтед», Англия
Йиллик маоши: 17 миллион евро
Амалдаги шартномаси: 30 июнь, 2021 йилгача
Ўз вақтида сэр Алекс Фергюсоннинг хатоси туфайли сотиб юборилган Поль Погбани ортга қайтариш «МЮ» учун жуда қимматга тушди. Жамоа трансфер рекордини янгилади. Қўшимчасига Погбани Англияда энг кўп маош оладиган футболчига айлантирди. Агар хитойликларни ҳисобга олмаганда бугунги кунда Поль дунёнинг энг кўп маош оладиган 5 футболчидан бири бўлиб турибди.

8. Ҳалк

Клуби: «Шангҳай СИПГ», Хитой
Йиллик маоши: 20 миллион евро
Амалдаги шартномаси: 30 июнь 2020 йилгача

Россия чемпионатининг юлдузи бўла олган Ҳалк бу ишни Хитойда ҳам давом эттирмоқда. Ҳозирча Хитой чемпионатида ўйнаб, ўзига берилаётган пулни қайсидир маънода тўлиқ оқлаётган футболчиларидан бири сифатида айнан уни кўрсатиш мумкин. Албатта 20 миллион евро даҳшатли даражада кўп. Аммо Хитойда тўланаётган пуллар ва футболчиларнинг фойдали иш коэффициентини ҳисобга олсак, бу борада Ҳалк етакчи.

7. Эзекиэл Лавесси

Клуб: «Ҳэбэй Чайна Форчун», Хитой
Йиллик маоши: 22 миллион евро
Амалдаги шартномаси: 31 декабрь 2017 йилгача
Хитой кимга пулларни совурмоқда, деган саволга айнан Эзекиэл Лавесси деб жавоб бериш мумкин. Баъзи манбаларга кўра, унинг маоши 35 миллион евро, аммо ишончли манбаларда у оладиган сумма 22 миллион евро деб кўрсатилган. Афсуски аргентиналик футболчи шу вақтга қадар олган маошининг ўндан бирини ҳам оқлай олгани йўқ. Икки йиллик фаолияти давомида биринчи мавсумда 10тагина учрашувда майдонга тушган футболчи бирорта ҳам гол кирита олмаганди. Яхшиямки, 2017 йилда унинг ўйинида бироз ўзгариш кузатилди ва Лавесси 20та гол уришнинг уддасидан чиқди. Агар шу ишни ҳам уддалай олмаганида бугун биз унинг маошини 1000дан бир нисбатда ҳисоблаб юрган бўлардик.

6. Гарет Бэйл

Клуби: «Реал» Мадрид, Испания
Йиллик маоши: 23 миллион евро
Амалдаги шартномаси: 30 июнь 2022 йилгача

Футболчиларнинг ўта қиммат нархи ҳақида гап кетганда ким пулига арзийди, деган савол ўртага чиқади ва кўп ўринларда айнан Бэйл нархига яраша футболчи деган фикрни эшитамиз. У муҳим ўйинларда киритган голлари билан буни исботлагандек ҳам бўлган. Аммо охирги вақтларда бу ҳам баҳсли саволга айланиб қолди. Гарет «Реал»га келганидан буён 4 йил давомида 18 (!) марта жароҳат олди ва мадридликларнинг жуда кўплаб учрашувларини ўтказиб юборган. Шунга қарамай, бугунги кунда «Реал» футболчи учун ойига салкам 2 миллион евро тўламоқда.

5. Оскар

Клуби: «Шангҳай СИПГ», Хитой
Йиллик маоши: 24 миллион евро
Амалдаги шартномаси: 31 декабрь 2020 йилгача

Оскарнинг Ҳалкдан кўпроқ маош олишини икки сабаб билан изоҳлаш мумкин. Биринчидан, у Ҳалкдан 5 ёшга кичик, иккинчидан Оскар Англия премьер-лигасининг энг кучли жамоаларидан бирини ташлаб Хитойга келган. Ҳозирча Оскар ҳам «Шангҳай»нинг етакчиларидан бири бўлиб турибди. Аммо Ҳалк билан солиштирганда унинг жамоа учун тегаётган фойдаси соя остида қолиб кетади. «СИПГ» мана шунча маош тўлаганига қарамасдан ОЧЛда финалга ҳам чиқа олмагани, Хитойдаги ички мусобақаларда ҳам бирорта соврни юта олмагани жуда ачинарли ҳолат албатта.

4. Криштиану Роналду

Клуби: «Реал» Мадрид, Испания
Йиллик маоши: 34 миллион евро
Амалдаги шартномаси: 30 июнь 2021 йилгача

Сўнгги икки йилда дунёнинг энг яхши футболчиси деб топилаётган Криштиану Роналду бу рўйхатда кучли учликда ҳам эмаслигини битта сабаб билан изоҳлаш мумкин. Юқорида турганлар янги шартнома имзолаганлар ва албатта ақлдан озган Хитой. Роналдунинг маошини оқлаши ҳақида саволга эса барчанинг жавоби бир хил янграши аниқ албатта. Ҳа, у ҳозирча олаётган пулига муносиб футболчи.

3. Неймар

Клуби: «ПСЖ», Франция
Йиллик маоши: 36 миллион евро
Амалдаги шартномаси: 30 июнь 2022 йилгача

«ПСЖ» Неймарни қўлга киритиш учун 222 миллион евро сарфлашидан ташқари унга йилига 36 миллион евро маош тўлашига ҳам тўғри келади. Месси ва Роналдудан кейин дунёнинг энг яхшиси бўлишга биринчи рақамли даъвогар бўлиб турган футболчини бошқачасига ўзига оғдириб олишнинг иложиси ҳам йўқ эди. Ҳозирча Неймар Франциядаги фаолиятининг ибтидосида турибди. Уни сотиб олишдан кўзланган мақсадга эришиладими ёки йўқ, бу ҳақида камида мавсум сўнггини кутишимиз керак бўлади.

2. Карлос Тевес

Клуб: «Шангҳай Шенҳуа», Хитой
Йилига: 38 миллион евро
Амалдаги шартномаси: 31 декабрь 2018 йилгача

Эзекиэл Лавессига муносиб рақобатчи. Албатта пулларнинг совурилиши масаласида 2015 йилда Аргентинага қайтаётган Тевес пул унинг учун ҳеч қачон биринчи ўринда турмаслигини ва Аргентинага фаолиятини якунлаш учун қайтаётгани ҳақида баёнот берганди. Орадан 1,5 йил ўтиб у барча гапларини инкор қилиб, ақлбовар қилмас шартнома эвазига «Шангҳай Шенҳуа» сафига келиб қўшилди ва у дунёнинг энг кўп маош оладиган футболчисига айланди. Натижа қандай бўлди дейсизми? Йил давомида 20 ўйинда 4та гол. Ҳозирча Тевеснинг ҳар битта голи «Шангҳай»га салкам 10 миллион еврога тушмоқда. Йўқ биз адашибмиз, Лавесси Тевеснинг олдида «фариштага» айланиб улгурибди.

1. Лионель Месси

Клуб: «Барселона», Испания
Йиллик маоши: 43 миллион евро
Амалдаги шартномаси: 30 июнь 2021 йилгача.

Ва ниҳоят бир йил ўтиб Тевес дунёнинг энг кўп маош олувчи футболчиси унвонини топширадиган бўлди. Декабрь ойидан бошлаб Месси энди янги шартнома бўйича маош олади ва яна энг кўп маош олувчи футболчи унвонини ўзига қайтариб олади. Агар 43 миллион евро йиллик маошга ким арзийди деб сўрасангиз, бугун бутун дунё футболида фақатгина Мессини кўрсатиш мумкин. Лео ҳам шу маънода ўзига мос бўлган ўринга яна қайтди.