Жанубий Корея қуёш энергияси ишлаб чиқаришни 5 маротаба оширади 

Жанубий Корея савдо, саноат ва энергетика вазири мамлакат ҳукумати 2030 йилгача қуёш энергияси ишлаб чиқаришни 5 маротабага ошириш режасини маълум қилди. 

Бу баёнот жорий йилда сайланган президент Мун Чжэ Ин янги атом электр станциялари қурилишининг давлат томондан қўллаб-қувватланишини тўхтатиш ва электр энергиянинг экологик соф манбаларига йўналиш олишга ваъда берганидан кейин берилган.

Жанубий Корея ҳукумати 6 та ядровий реактор қурилишини бекор қилди.  

Ҳаммаси бўлиб мамлакат 2030 йилгача ишлаб чиқариладиган электр энергиянинг бешдан бир қисмини тикланувчи манбалардан олмоқчи. Ўтган йил бу кўрсаткич 7 фоизни ташкил қилганди. Бунинг учун белгиланган муддатга қўшимча 30,8 ГВт қуёш ва 16,5 ГВт шамол энергияси олиш режалаштирилмоқда. Қўшимча энергия йирик лойиҳалардан ҳамда хусусий уй хўжаликлари ва кичик бизнесдан олинади, деб айтди вазир Пайк Унгю.

“Биз тикланувчи энергетика ривожланиши йўлини тубдан ўзгартирамиз, бунда фуқаролар тикланувчи энергияни сотишда осон иштирок эта оладиган шароитлар яратамиз”, деб айтди вазир.

Бу 2022 йилгача 30 та уй хўжалигидан тахминан биттаси қуёш панеллари билан жиҳозланишини англатади.

Ҳозирда Жанубий Корея атом энергиясини ишлатиш бўйича дунёда 5-ўринни эгаллайди. Мамлакатда 24 та амалдаги реактор мавжуд бўлиб, улар мамлакатнинг электр энергияга эҳтиёжининг учдан бир қисмини таъминлайди.

Жанубий Корея уй хўжаликлари томондан ортиқча электр энергияни сотиш тизимини синовдан ўтказиб келмоқда. Блокчейнга асосланган хизмат оддий биржа каби ишлайди: фойдаланувчи ўз таклифини билдиради, электр энергияни ўтказиб беради ва бунга баллар олади. Бу балларни нақд пулга алмаштириш ёки электромобилларни қувватлашда қўллаш мумкин.