Cuberg стартапи Boeing’нинг электр самолётлари учун батарея ишлаб чиқаради 

Boeing компанияси авиасозлик келажагини электр самолётларда кўрмоқда. Аввалроқ компания электр самолётлари ишлаб чиқарувчи Zunum стартапига инвестиция киритганди. Энди эса корпорация аккумуляторлар ишлаб чиқарувчи Cuberg стартапи акциялари пакетини сотиб олди. 

Cuberg 2015 йилда Стэнфорд университетидан чиққан стартап бўлиб, унинг жамоаси юқори зичликдаги батареялар яратиш билан шуғулланади. Агар келажакда электр двигателлар ҳавога катта ўлчамли самолётларни кўтара олса, буни юқори зичликдаги батареялар ҳисобига уддалай олади: улар кичикроқ ўлчамларга эга бўлган ҳолда ўзига кўпроқ энергия сиғдира олади. Стартапда ўзи ишлаб чиққан электролитга патент ҳам бор.    

Cuberg вакилларининг айтишича, бу электролит юқори вольтли катодларни қўллашга имкон беради ва шу билан бирга батареяни кўп миқдорда қувватлаш циклларидан кейин ҳам самарадорлигини сақлаб қолади. 

Стартап ўз батареяларининг прототипини чиқарди ва Boeing уни юқори баҳолаган. Компания вакиллари Cuberg аккумуляторлари бозорда кўриш мумкин бўлган энг юқори зичликдаги энергияга эгалигини айтишди. Стартап томонидан қўлланувчи ноёб кимёвий моддалар эса электр ҳаво транспорти учун хавфсиз ва барқарор ечим бўлиши мумкин.    

Аввалроқ Boeing Zunum стартапига ишонч билдириб, унга сармоя киритганди. Стартап 2022 йилгача 12 ўринли гибрид самолёт ишлаб чиқаришга ваъда бермоқда. Самолёт бортида анъанавий двигателлар билан бирга иккита электромотор ўрнатилади. Муҳандисларнинг прогнозларига кўра, бу парвозлар нархини 80 фоизгача камайтиради. Янги самолётлар 1600 километргача узоқликка учишга мўлжалланади. Эҳтимол Boeing ва Cuberg ҳамкорлиги келгусида гибрид самолётлардан тўлиқ электрлиларига ўтишга имкон берар.

Дарвоқе, Ле-Буржедаги авиасалонда Eviation Aircraft компанияси 965 километрлик масофани учиб ўта оладиган электр самолёт прототипини тақдим қилди.