Норвегия терма жамоаси нима учун Олимпиадага кўп миқдорда дори воситаси олиб борди?

Олимпиадада иштирок этувчи Норвегия терма жамоаси тиббий хизмати раҳбари Мона Кьелдсберг терма жамоа ўзи билан Олимпиадага нима учун астмадан 6 мингта доза восита ва ингляция ўтказиш учун 10 та қурилма олиб келганига тушунтириш берди. Унинг айтишича, бу миқдор унча кўп ҳисобланмайди.

Дори воситалари терма жамоанинг Жанубий Кореяга келганда соғлом бўлган аъзолари учун мўлжалланган. Астмадан азият чекувчи спортчилар ўзларининг дори воситаларидан фойдаланадилар.

Таъкидланишича, новергияликлар олиб келган дори воситалари орасида симбикортдан 1800 доза, альвеско, сальбутамол ва атровентдан 1200 тадан доза, вентолиндан 360 доза бўлган. 

“Биз олиб келган дори воситалари дозаси кимгадир кўп туюлиши мумкин. Бироқ уни улушларга бўлиб чиқилса, бу унча катта миқдор эмаслигини англайсиз”, деб айтган Кьелдсберг.

Унинг айтишича, Пёнгчангга ҳаммаси бўлиб 43 та ингалятор олинган ва улар индивидуал равишда қўлланади. Кьелдсбергнинг қўшимча қилишича, дори воситаларининг катта қисми ортга қайтарилади.

2017 йилдан Бутунжаҳон аксилдопинг агентлиги (WADA) сальбутамолнинг қўлланишини қисман тақиқлаган. Агар тиббий томондан рухсат берилган бўлса, спортчилар бу воситадан кунига 1600 микрограммдан кўп қабул қила олишмайди. 

2016 йил ёзида норвегиялик чанғичи Мартин Сундбю сальбутамолни мумкин бўлган миқдордан кўпроқ истеъмол қилганлиги фош қилинган. Ўшанда WADA уни 2 ойга четлатган. Шундан кейин Норвегия терма жамоасининг кўплаб етакчилари астмадан сальбутамол негизида тайёрланган дори қабул қилишлари маълум қилинган. Шундан кейин бир қатор давлатлар WADA’га астмага эга норвегиялик спортчиларни ўрганиш илтимоси билан мурожаат қилган.