Мадуро Америкалар саммитида иштирок этмаслигини маълум қилди 

10 апрелда Венесуэла президенти Николас Мадуро Перуда бўлиб ўтадиган Америкалар саммитида иштирок этмаслигини маълум қилди.

“Кеча мен Америкалар саммитига бормасликка қарор қилдим. Мен 2002 йилги давлат тўнтарувининг муваффақиятсизлигини нишонлаш учун халқим билан қоламан”, деб айтган Мадуро давлат телевидениеси эфирида.

Унинг айтишича, қитъа давлатлари етакчиларининг учрашуви Венесуэла учун устувор тадбирлар қаторига кирмайди.

Ўтган ҳафта Мадуро таклиф қилинмаса ҳам боришга интилаётган Америкалар саммитига муносабатини кескин ўзгартирган ва бу тадбирда иштирок этишни вақтни бекор йўқотиш деб атаган. Февралдан бери Венесуэла ташқи ишлар вазирлиги ҳам, Мадуронинг ўзи ҳам Лиманинг қаршилигига қарамай саммитга боришини таъкидлаб келаётганди.

Аввалроқ Перу ҳукумати Мадурога йўллаган таклифини қайтариб олиб, унинг 13-14 апрелда ўтадиган саммитда қатнаша олмаслигини маълум қилганди.