Путин Меркель билан суҳбатда Сурияга зарбаларни кескин қоралади

Россия президенти Владимир Путин ГФР канцлери Ангела Меркель билан ўзаро телефон мулоқоти давомида АҚШ ва унинг иттифоқчиларининг Сурияга берган зарбаларини тажовузкорлик акти ва халқаро ҳуқуқнинг бузилиши деб атади. Бу ҳақда Кремль сайтида хабар қилинади.

«Сурияда ва унинг атрофидаги вазиятнинг кескинлашиши батафсил муҳокама қилинди. Россия президентининг таъкидлашича, Сурия Араб Республикасига қарши тажовузкорлик актини содир этган ғарб давлатлари гуруҳининг хатти-ҳаракати халқаро ҳуқуқ нормалари, жумладан БМТ Низомини қўпол тарзда бузади, ҳамда Сурия инқирозига тинч йўл билан ечим топиш жараёнига жиддий салбий таъсир кўрсатади», - дейилади хабарда.

Путин ва Меркель Сурия бўйича керакли саъй-ҳаракатларни тиклашга кўмак кўрсатиш ҳамда бу борадаги икки томонлама алоқаларни давом эттиришга тайёр эканини билдирган.

Эслатиб ўтамиз, аввалроқ Буюк Британия бош вазири Тереза Мэй Россияни айблаб чиққанди.