Словакияда орфографик хатоли 0 евро сотувга чиқди

Фото: Euro Souvenir Slovensko

2 июнь куни Словакияда 0 евро номиналли сувенир банкнотаси сотувга чиқди. Купюралар орфографик хато билан босмадан чиққан, дея хабар беради Slovakia International радиоси.

Банкнотада Дунай узра қад кўтарган тарихий Братислава қалъаси тасвирланган, қачонлардир бу ерда Венгрия ҳукмдорларига тож кийдириш маросими бўлиб ўтган.

Bratislavský hrad (Братислава қалъаси) ёзувида иккинчи s ҳарфи тушиб қолдирилган ва Bratislavký hrad деб ёзилган. Таъкидланишича, келажакда шу хато туфайли банкнота қиймати ошиши мумкин.

Аввал Словакияда Ғалаба кунига шунингдек 0 евро номиналли сувенир банкнотаси ишлаб чиқарилган.