Видео: Нидерландия бош вазири пол тозалади

Нидерландия бош вазири Марк Рютте парламент биносига киришда бехосдан кофесини полга тўкиб юборди ва швабрани олиб, полни тозалашга киришди. Ушбу ҳолат видеоси Нидерландиянинг Туркиядаги элчиси Кис ван Бекнинг твиттердаги саҳифасида эълон қилинган.

Видеода Марк Рютте хушчақчақ кайфиятда чашкадаги қаҳвани кўтарган ҳолда парламент биносига киргани, сўнг қўли чайқалиб, ичимлик ерга тўкилганини кўриш мумкин. Шунда у фаррошларнинг ҳай-ҳайлашига қарамасдан, полни арта бошлайди ва олқишларга сазовор бўлади.

Ижтимоий тармоқдагилар бош вазирнинг самимийлигига шубҳа билдиришганида, элчи Кис ван Бек уларга жавоб қайтарган.

«Мен бир неча марта у велосипедида Ҳаагани сайр қилганига гувоҳ бўлганман», дея ёзган ван Бек.