Москвада пиёдаларни уриб юборган таксичи ўз айбини тўлиқ тан олди

Москва марказида пиёдаларни уриб юборган таксичи Чингиз Анарбек ўғли Москванинг Таганка туман судида қилган ишидан тавба қилаётганини айтди. Судда таксичига нисбатан эҳтиёт чораси белгилаш масаласи кўриб чиқилмоқда.

“Мен барчадан кечирим сўрайман. Мен икки кун ухламадим. Оиламни боқиш учун деярли тинмай ишлашимга тўғри келди. Мен нима бўлганини ўзим тушунмай қолдим, уйқусизликдан толиққан эдим ва газ тепкисини адаштириб юбордим. Мен айбимни тўлиқ тан оламан ва жабрланганлар ҳамда уларнинг яқинларидан кечирим сўрайман”, деб айтган айбланувчи.

Қирғизистоннинг Жалолободидан бўлган 38 ёшли эркакнинг айтишича, у суд билан таржимон ёрдамида мулоқот қилган. У таксида ишлашдан аввал 6 йил ошпазлик қилган.

Тергов айбланувчига нисбатан эҳтиёт чораси сифатида уни 2 ойга ҳибсга олишни сўраган.

Аввалроқ маълум қилинганидек, таксичи бошқарувни қўлдан чиқариб, пиёдалар йўлкасига чиқиб, 7 кишини уриб юборган.  

Москва соғлиқни сақлаш департаментида 8 киши жабрлангани маълум қилинган. 17 июнда жабрланганлардан 3 нафари шифохонада қониқарли ҳолатда қолаётганлари ва яқинда уларга жавоб берилиши айтилган.

Маълум қилинишича, жабрланганлар орасида 2 мексикалик, 2 озарбойжонлик, 2 россиялик ва бир украиналик бўлган.