Шамолдан пул қилиш: қиролича Елизавета II’нинг энг сердаромад бизнеси маълум қилинди 

Bloomberg агентлиги таҳлилчилари Британия қироллик оиласининг энг сердаромад бизнесини маълум қилишди. Аниқланишича, қироллик оиласига офшор шамол парклари учун денгиз шельфининг лизингга берилиши энг кўп даромад келтирар экан. Бу бизнес нафақат даромадли, балки фойдали ҳамдир. 2020 йилгача денгиз шамоли Буюк Британиядаги электр энергияга эҳтиёжнинг 10 фоизини қоплаши мумкин.

Қиролича Елизавета II’нинг активларини The Crown Estate Ltd. компанияси бошқаради. Айни вақтда бу компанияга Бирлашган Қиролликнинг турли қисмларидаги йирик кўчмас мулк объектлари, қишлоқ хўжалиги ва шельф ерлари тегишли. Компаниянинг 2017 йилдаги соф даромади 329,4 млн фунт стрелингни ташкил қилган. Қонунга кўра, даромаднинг бир қисми Британия ғазнасига ўтказилади, қироллик оиласи эса ўз навбатида ўзига тегишли улушни олади.    

Кейинчалик бу пуллар Елизавета II ва унинг меросхўрларининг саройлари ва расмий қароргоҳларини сақлаш учун сарфланади. Мисол учун, шаҳзода Гарри ва Меган Марклнинг никоҳ тўйига харажатлар Кенсингтон саройи томонидан қопланган.  

Аввалроқ маълум қилинишича, Елизавета II тожи жуда оғирлигидан шикоят қилган. Қиролича тож оғирлиги сабабли “унинг бўйнини синдириб юбориши мумкинлигидан” хавфсираш билдирган. Таъкидланишича, қиролича тожи 1,3 кг оғирликда бўлиб, уни 2868 та бриллиант, 17 та сапфир, 11 та зумрад ва бир неча юз марварид безаб туради.