Ўзбекистон олимпиячилари Қатарни йирик ҳисобда енгиб, плей-оффга чиқишди

Ўзбекистон олимпия терма жамоаси бугун Осиё ўйинларидан ўрин олган иккинчи ўйинни Қатар ёшларига қарши ўтказди.

Беллашув тўлиғича терма жамоамиз устунлиги остида ўтди. 37-дақиқада Забиҳулло Ўринбоев ҳисобни очган бўлса, 43-дақиқада Икром Алибоев жаримадан ажойиб гол уриб, ҳисобни 2:0га етказди.

Иккинчи бўлимни фаол бошлаган футболчиларимиз тезкор гол уришга муваффақ бўлишди. Достон Ҳамдамов 47-дақиқада рақибни чиройли тарзда алдаб, Қатар дарвозасини ишғол қилди – 3:0. 49-дақиқада Жавоҳир Сидиқов бўш қолган дарвозага осонлик билан тўпни йўллаб ҳисобни 4:0га етказган бўлса, 53-дақиқада Жалолиддин Машарипов ўзига нисбатан ишлатилган қўполликдан сўнг пенальтидан гол киритди ва ҳисоб 5:0га етди. 76-дақиқада эса захирадан майдонга тушган Бобур Абдухолиқов Қатар дарвозасига гол киритиб, якуний ҳисоб 6:0 бўлишини таъминлади. 

Бу ғалаба Равшан Ҳайдаров шогирдларига муддатидан аввал 1-ўринни қўлга киритиб, кейинги босқичга чиқиш имкониятини берди. Сўнгги тур ўйинини вакилларимиз Таиланд ёшларига қарши ўтказишади.

Осиё ўйинлари. Жакарта-2018
В гуруҳи, 2-тур, 16 август
Қатар U23 - Ўзбекистон U23 - 0:6
Голлар: З.Ўринбоев (37), И.Алибоев (43), Д.Ҳамдамов (47), Ж.Сидиқов (49), Ж.Машарипов (53 пен), Б.Абдухолиқов (76)
Қатар ОТЖ: М.Бадриддин, Т.Салмон, У.Алимадий, Т.Алмуҳаза, А.Ҳесаба, М. Ал Шаммарий, Н.Ал наср,Ж.Омар, М.Фараж, А.Ал Саадий, О. Ал Аҳмад.
Ўзбекистон ОТЖ: Ботирали Эргашев, Аббос Отахонов (Дониёр Нарзуллаев, 55), Достон Турсунов, Рустам Ашурматов, Акром Комилов, Икром Алибоев, Одил Ҳамробеков, Достон Ҳамдамов, Жавоҳир Сидиқов (Жасурбек Яхшибоев, 76), Жалолиддин Машарипов, Забиҳулло Ўринбоев (Б.Абдухолиқов, 60).