Трамп марҳум Маккейн мақталган баёнотни чоп этмасликка кўрсатма бергани маълум қилинди 

АҚШ президенти Дональд Трамп сенатор Жон Маккейннинг вафоти муносабати билан тайёрланган баёнотни чоп этмасликни буюргани маълум қилинди. Бу ҳақда Washington Post нашри манбаларга иқтибос келтирган ҳолда хабар берди. 

Нашр маълумотларига кўра, Оқ уй ходимлари Маккейн Вьетнам уруши вақтидаги жасорати, асирда бўлгани ва АҚШга қилган хизмати учун мақталган баёнот тайёрлашган.

Бироқ Трамп ўз матбуот Сара Сандерс ва Оқ уй аппарати бошлиғи Жон Келлининг баёнотни қўллаб-қувватлашига қарамай, унинг ўрнига оддий хабар билан кифояланишни афзал кўришини айтган.

Маккейннинг вафотидан кейин Трамп 27 августга ўтар кечаси ўз таъзиясини билдирган твитни эълон қилган, Оқ уйнинг бу борадаги расмий баёноти эса берилмаган. 

Маккейн 81 ёшида мия саратонидан вафот этди. Унинг дафн қилиниши маросими 2 сентябрда Аннаполис шаҳрида бўлиб ўтади.

Аввалроқ New York Times нашри Трамп сенаторнинг дафн маросимига таклиф қилинмаганини маълум қилганди. Дафн маросимида вице-президент Майк Пенс, АҚШнинг собиқ президентлари Барак Обама ва Кичик Жорж Буш иштирок этади.

Трамп ва Маккейн ўртасидаги муносабатлар “ҳавас қилса арзигулик” бўлмаган. Маккейн Трампни Россияга нисбатан “юмшоқ” сиёсати учун танқид қилиб келган.