«Новичок» можароси давом этади — Солсберидаги ресторанда заҳарланган аёл россиялик ҳарбийнинг қизи бўлиб чиқди

Россиялик собиқ разведкачи Сергей Скрипаль ва унинг қизи Юлия заҳарланган Англиянинг Солсбери шаҳрида 16 сентябрь куни заҳарланиш билан боғлиқ яна бир воқеа содир бўлди.

Полиция шаҳардаги Prezzo ресторанида икки кишининг заҳарлангани ҳақида маълум қилганди. Британиянинг «The Sun» нашри заҳарланганларнинг ким эканини аниқлади.

Нашрнинг маълум қилишича, заҳарланган эр-хотинлардан бири Анна Шапиро - россиялик модель, унинг эри эса британиялик Алекс Кинг. Аёлнинг ёши 30 ёшда, эркак эса 42 ёшда бўлгани айтилмоқда.

Шапиронинг айтишича, у Нижний Новгородда туғилган ва 2006 йилда Исроил фуқаролигини олган. 2008 йилда эса Лондонга келиб, бўлажак турмуш ўртоғи билан танишган.

Ушбу жуфтлик ресторанда пицца, салатлар ва оқ вино буюртма қилган. Шапиронинг айтишича, у Россияда юқори лавозимда ишлаган собиқ ҳарбийнинг қизидир. Анна ва унинг оиласи Лондонда яшаётганида рус разведкачилари томонидан таъқиб қилинган ва жабрланувчининг сўзларига кўра, эр-хотинга бир неча марта таҳдид қилинган.

«Ресторанга кираётганда бизни ҳам Скрипаллар каби заҳарлашлари мумкин, деб ҳазиллашгандим»,- дейди собиқ Россия фуқароси бўлган 30 ёшли Анна. Унинг айтишича, овқатланганларидан сўнг эрининг аҳволи ёмонлашган ва у ҳожатхонага чиққан. Эри келавермагач, Анна унинг орқасидан борган ва турмуш ўртоғини оғзидан кўпик чиққан ҳолда ҳушсиз ётганини кўрган. Бироздан кейин аёлнинг ҳам аҳволи ёмонлашган.

Алекс Кинг деб айтилаётган 42 ёшли Аннанинг эрини зудлик билан шифохонага олиб боришган ва сунъий кома ҳолатига туширишган. Кўп ўтмай эркак ўзига келган.

«The Sun»нинг ёзишича, эр-хотин стрихин оғуси билан заҳарланган бўлиши мумкин.