Буюк Британия ҳукумати Россияни WADA’га киберҳужумларда айблади

Буюк Британия ҳукумати Россияни Бутунжаҳон допингга қарши кураш агентлигига (WADA) киберҳужумларда айблади.

Буюк Британиянинг фикрича, WADA тизимини 2017 йил август ойида бузиб кириш Бош разведка бошқармаси (ГРУ) томонидан ташкил этилган. Шунингдек, ГРУ АҚШ Демократик партияси ва Британия телевизион тармоғига киберҳужумларда ҳам иштирок этган бўлиши мумкин.

Бу ҳақда Буюк Британия ташқи ишлар вазири Жереми Хант маълум қилди. У ГРУни амалга оширган ҳаракатлари учун қоралади.

«ГРУнинг ҳаракати тушунарсиз ва аҳмоқонадир. Бизнинг хабаримиз аниқ: биз иттифоқчиларимиз билан биргаликда ГРУнинг барқарорликка путур етказиш бўйича уринишларига таъсир кўрсатамиз», - дея вазирнинг сўзларини келтиради «Би-би-си».

Эслатиб ўтамиз, аввалроқ Нидерландия ГРУнинг киберҳужуми олди олинганини маълум қилганди. Мамлакатдан 4 россиялик чиқариб юборилган.