Германияда 25 йил аввалги қотиллик сабабли кўл қуритилади  

Германиянинг Остерхольц туманидаги (Қуйи Саксония федерал ери) Титьензе кўли 25 йил аввал бир аёлнинг йўқолиши ишининг тергов қилиниши доирасида қуритилади. Бу ҳақда NDR телеканали хабар қилди.  

Полиция кўл тубида 1993 йилда йўқолган аёл ва жиноятни содир этишда қўлланган қуролни аниқлашга умид қилмоқда. Бу қурол аёлни ўлдиришда гумон қилинаётган шахс қотилликни содир этишдан 2 йил аввал отасидан олган тўппонча бўлиши мумкин. 

Терговчилар аёлни ўша вақтда у билан бирга яшаган 58 ёшли эркак ўлдирган бўлиши мумкин, деб ҳисоблашмоқда. Таъкидланишича, аёл йўқолиб қолишидан аввал эркак билан алоқани узмоқчи бўлган ва айнан шу ҳолат жиноятга сабаб бўлгани тахмин қилинмоқда.

Маҳаллий полициянинг тахминича, кўлни қуритишга 3-5 кун вақт кетади. Бу ишлар доирасида қўшни кўлга 35 млн литр сув тортилади. Кўлни қуритиш маҳаллий табиатни асраш идоралари билан келишилган. Полиция тегишли ишларни бажаргач, сув яна кўлга қайтарилади.

Маълумотларга кўра, аёл йўқолиб қолгандан бир йил ўтгач, яъни 1994 йилда балиқчилар кўлда косметика, тиш пастаси ва аёлнинг никоҳ узуги солинган пакетни топиб олишган.