Туркияда сайёҳ 35 минг евролик узукни ютиб юборди

Туркиянинг Мармарисидаги заргарлик дўконидан ирландиялик сайёҳ томонидан ютиб юборилган 35 минг евролик бриллиант узук эгасига қайтарилди.

Маълум қилинишича, 54 ёшли сайёҳ бир нафаргина ходим ишлаётган дўконга кириб, узукни кўрсатишни сўраб, сўнгра уни ютиб юборган. 

Сайёҳ полицияда айбини тан олмаган, бироқ кузатув камераларидан олинган видео кўздан кечирилгач ҳибсга олинган. Шифохонадаги кўрик узук эркак ичида эканлигини кўрсатган.

Полиция узук табиий йўл билан чиқишини кутган, бироқ уни жарроҳлик йўли билан олишга тўғри келган. 

Эркак бу ишини Ирландиядаги автоҳалокатда рафиқасини йўқотгани, машина кўлга тушиб кетгани, рафиқасининг бриллиант никоҳ узуги топилмагани билан тушунтирган. “Бу воқеадан кейин бриллиант узукларни кўрсам ақлимни йўқотаман. Мен уларни кўрган ҳар сафар рафиқам эсимга тушади”, деб айтган сайёҳ. Унинг таъкидлашича, у бундай онларда узукни олишга кучли хоҳиш сезади.