Ўзбекистонлик 3 боксчи бир кечада рингга чиқади. Исроил Мадримов дебютдаёқ камар учун жанг қилади

24 ноябрь куни АҚШнинг Атлантик-Сити шаҳридаги «Hard Rock Hotel & Casino» аренасида профессионал бокс кечаси ўтказилади.

Тошкент вақти билан 25 ноябрь куни соат 07:00дан бошлаб ўзбекистонлик 3 нафар боксчи рингга кўтарилади.

Олимпиада ва жаҳон чемпионати совриндори Муроджон Аҳмадалиев (4-0, 3 КО) америкалик Исак Заратега (16-3-3,)қарши жанги ўтказади. Профессионал рингдаги бешинчи жангида у 10 раундлик жангда  WBA Inter-Continental Super Bantamweight Title чемпионлик камарини ҳимоя қилади.

Рио-Олимпиадасининг кумуш медали соҳиби, ҳаваскор боксда жаҳон чемпиони бўлган Шаҳрам Ғиёсов (5-0, 4 КО) эса шу куни мексикалик Мигель Замудио билан жанг қилади. 27 ёшли Замудио профессионал боксда 53та жанг ўтказишга улгурган. Жангларнинг 41тасида ғалаба қозонган (25таси нокаут эвазига). 11та жангда эса мағлубият аламини тотиб кўрган (9та нокаут). Яна битта жангда эса дурангга эришган.

Осиё чемпиони, Осиё ўйинлари ғолиби Исроил Мадримов эса бу кеча дебют қилади. У профессионал боксдаги дебютидаёқ кучли рақибга қарши 10 раундлик жанг учун рингга чиқади.
Унинг рақиби мексикалик Владимир Эрнандес (10-2, 6КО) бўлади. Эрнандес 12та жанг ўтказиб, шуларнинг 10тасида ғалаба қозонган. Олтита жангда рақибларини нокаутга учратган. Икки бор ўзи мағлуб бўлган. 

Биринчи ўрта вазн тоифасидаги (- 69 кг) Мадримовнинг мураббийи Вадим Корнилов у илк жангдаёқ титул учун рингга чиқмоқда. Ўртага WBA Intercontinental камари тикилган. Агар у жангда ғалаба қозонса, профессионал рингдаги бешта жангдан кейиноқ ўз вазн тоифасида жаҳон чемпионлиги учун рингга чиқиши мумкин бўлади.

Қайд этиш керакки, уч ўзбекистонлик боксчи ҳам Россиянинг «Мир Бокса» промоутерлик компанияси билан шартнома имзолашган. Ушбу бокс оқшоми Россиянинг Матч ТВ телеканали орқали тўғридан-тўғри трансляция қилинади. 

Айни вақтда боксчиларнинг ҳаваскор боксдаги мураббийлари Тўлқин Қиличев ва Раҳматжон Рўзиохунов ҳам АҚШга бориб, шогирдларига жангга тайёрланишда ёрдам беришмоқда.