Германиянинг барча йирик аэропортларида хавфсизлик чоралари кучайтирилди 

Германия федерал полицияси мамлакатнинг барча 14 та йирик аэропортида хавфсизлик чораларини кучайтирди. Бу ҳақда 20 декабрда Bild нашри маълум қилди. 
 
Нашр шу куни аввалроқ 3 номаълум киши Штутгарт аэропорти ортидан мунтазам кузатув олиб боргани сабабли аэропортда хавфсизлик чоралари кучайтирилганини маълум қилган. Кузатув олиб борилаётгани видеокузатув камералари таҳлил қилингандан кейин маълум бўлган. Аэропортга радикаллар томонидан хавф солинаётган бўлиши мумкинлиги айтилган. 19 декабрдан бошлаб полиция ходимлари аэропортни қаттиқ назорат қилишмоқда, уларнинг сони эса анча оширилган. 

Маълум қилинишича, кейинроқ хавфсизликни кучайтириш зарурлиги ҳақидаги огоҳлантиришни барча йирик аэропортлар олган.