«Милан» голсиз ва ғалабасиз сериясини якунлади 

Италия чемпионатининг 19-турида «Милан» СПАЛни мағлуб этди. Миландаги «Жузеппе Меацца» стадионида кечган учрашув майдон эгаларининг 2:1 ҳисобидаги ғалабаси билан якунланди.

Ўйиннинг 13-дақиқасида меҳмонлар ҳимоячиси Андреа Петанья ҳисобни очди. Аммо кўп ўтмасдан Самуэль Кастильехо мувозанатни тиклади. Қайд этиш керакки, бу миланликлар жамоасининг кейинги 5 ўйиндаги илк голи бўлди. «Милан» бунгача «Фиорентина»га ютқазган (0:1), «Торино», «Болонья» ва «Фрозиноне» каби жамоалар билан голсиз дуранг қайд этганди. Миланликларнинг голсиз серияси 395 дақиқани ташкил қилди.

Ўйинда ҳал қилувчи голни Гонсало Игуаин иккинчи бўлимда урди. Унинг голи «Милан»га кейинги 5 ўйиндаги илк ғалабани келтирди.

Бу ғалаба эвазига «Милан» очколари сонини 31тага етказди ва чемпионат турнир жадвалида бешинчи ўринга кўтарилди. Чемпионлар лигасига йўлланма берувчи тўртинчи ўриндан миланликлар клубини бир очко ажратиб турибди. СПАЛ 17 очкоси билан 16-ўринда қолди.

Кейинги турда, 21 январь куни «Милан» «Женоа» меҳмони бўлади. СПАЛ бир кун олдинроқ «Болонья»ни қабул қилади.

Италия чемпионати
19-тур
Милан – СПАЛ 2:1 (1:1, 1:0)
Голлар: 0:1 – 13 Петанья, 1:1 – 16 Кастильехо, 2:1 – 64 Игуаин.
Милан – Доннарумма, Абате (Калабрия, 62), Сапата, Романьоли, Родригес, Кессиэ, Бакайоко, Чалханоглу, Сусо, Игуаин (Борини, 82), Кастильехо (Кутроне, 62).
СПАЛ – Гомис, Чонек, Фелипе, Бонифаци, Дикманн (Викари, 46), Миссироли, Скьяттарелла (Вальдифьори, 74), Куртич, Коста (Фарес, 53), Петанья, Антенуччи.
Огоҳлантиришлар: Куртич (51), Кастильехо (56), Скьяттарелла (70), Сапата (73), Сусо (79).
Четлатиш: Сусо (89).