Салоҳ АПЛнинг энг самарадор футболчисига айланиб олди

«Ливерпуль» ҳужумчиси Муҳаммад Салоҳ Англия чемпионатининг 20-турида «Арсенал»га қарши кечган ва 5:1 ҳисобидаги ғалаба билан якунланган ўйинда бир гол урди ва бир голга узатма берди.

Эндиликда Салоҳ Англия Премьер-лигасининг жорий мавсумида «гол+пас» тизимида 20 очко тўплаган биринчи футболчига айланди. Мисрлик ҳужумчи АПЛ ўйинларида 13 гол урган ва 7 голга узатма берган. Унинг энг яқин таъқибчиси «Челси» ҳужумчиси Эден Азар бўлиб, у 19 очко тўплаган (10+9).

Бундан ташқари, Салоҳ Англия чемпионати тўпурарлари рўйхатида Пьер-Эмерик Обамеянг ва Ҳарри Кейн каби 13тадан гол билан пешқадамлик қилмоқда.

Айни вақтда 26 ёшда бўлган Салоҳ АПЛнинг ўтган мавсумида 36 ўйинда 32 гол уриб, энг яхши тўпурар бўлганди.