Saloh APLning eng samarador futbolchisiga aylanib oldi

«Liverpul» hujumchisi Muhammad Saloh Angliya chempionatining 20-turida «Arsenal»ga qarshi kechgan va 5:1 hisobidagi g‘alaba bilan yakunlangan o‘yinda bir gol urdi va bir golga uzatma berdi.

Endilikda Saloh Angliya Premer-ligasining joriy mavsumida «gol+pas» tizimida 20 ochko to‘plagan birinchi futbolchiga aylandi. Misrlik hujumchi APL o‘yinlarida 13 gol urgan va 7 golga uzatma bergan. Uning eng yaqin ta'qibchisi «Chelsi» hujumchisi Eden Azar bo‘lib, u 19 ochko to‘plagan (10+9).

Bundan tashqari, Saloh Angliya chempionati to‘purarlari ro‘yxatida Per-Emerik Obameyang va Harri Keyn kabi 13tadan gol bilan peshqadamlik qilmoqda.

Ayni vaqtda 26 yoshda bo‘lgan Saloh APLning o‘tgan mavsumida 36 o‘yinda 32 gol urib, eng yaxshi to‘purar bo‘lgandi.