МИБ ходимига болта билан ташланган шахсга нисбатан жиноят иши очилди

2019 йил 14 март куни Бухоро шаҳар М.Авфий кўчасидаги уйда яшовчи фуқаро Ш.Н.да табиий газдан фойдаланганлиги учун 1 млн. 639 минг сўм қарздорлиги мавжуд бўлган.

МИБ хабарига кўра, у ушбу қарздорликни тўламаслик мақсадида хонадонини қарздорлиги белгиланган меъёрдан юқори бўлганлиги учун газ тармоғидан узиб қўйиш учун келган Мажбурий ижро бюроси Бухоро шаҳар бўлими ходимларига хизмат вазифаларини  бажарилишига фаол қаршилик кўрсатган.

Қайд этилишича, ушбу шахс қўлидаги болта билан уларга ташланиб, шаъни ва қадр-қимматини камситиб, ножўя сўзлар билан ҳақорат қилган.

Мазкур ҳолат юзасидан фуқаро Ш.Н.га нисбатан Жиноят кодексининг 219-моддаси 2-қисми ва 140-моддаси 3-қисми “а” банди билан жиноят иши қўзғатилган.