Зеленскийнинг уйи яқинида пулемёт ўрнатилган машинада номаълум шахслар ушланди

Фото: Facebook / Антон Геращенко

Украина президенти лавозимига номзод Владимир Зеленскийнинг уйи яқинида полиция ходимлари томонидан “Тойота-Прадо” автомобилида пистирмада ўтирган уч номаълум шахс ушланди. Бу ҳақда олий рада депутати Антон Герашченко фейсбукда маълум қилган.

Ушланганлар йўлтанламаснинг орқа қисмини ўт очиш учун мослаштиришган – улар ўриндиқларни олиб ташлаб, ёнларидан топилган йирик калибрли пулемёт учун таянч вазифасини ўтаган мосламани ўрнатишган.

Таъкидланишича, гумонланувчилар ўз “ўлжасини” “Перлина Італії” коттеж посёлкасига олиб борувчи йўл ёнидаги ўрмонда кутиб ўтиришган. Зеленскийнинг уйи айнан шу посёлкада жойлашган.

“Қуролланган гуруҳ” ушлангани ҳақида Украина бош прокурори Юрий Луценко ҳам хабар қилган. Бироқ унинг версиясига кўра, ушланганлар львовлик жиноий авторитетга суиқасд қилмоқчи бўлишган.

Тайёрлаган Шуҳрат Раҳимов

#Володимир Зеленский #пулемёт

2019 йилнинг 31 мартида Украинада президентлик сайловлари ўтказилади. Сайловда иштирок этиш учун 44 номзод, шу жумладан мамлакатнинг амалдаги президенти Пётр Порошенко ҳужжат топширган.