Украинада Зеленскийни сайловдан четлаштириш тўғрисида судга даъво аризаси берилди

Фото: РИА Новости

Олтинчи апелляцион маъмурий суди Владимир Зеленскийни Украина президентлигига номзодликка рўйхатга олишни бекор қилиш тўғрисидаги даъво аризасини кўриб чиқади. Бу ҳақда адвокат ва "Украина акционерлар ассоциацияси" жамоат ташкилотидан сайловларни кузатувчи Андрей Хилько маълум қилди.

"Суд менинг расмий кузатувчи сифатидаги даъвом бўйича иш очди", - деб ёзди Хилько фейсбукда.

Адвокатнинг айтишича, суд мажлиси бугун Киев вақти билан 21.00да бўлиб ўтади.

Украина президент сайлови 31 март куни бўлиб ўтди, аммо ҳеч бир номзод етарлича овоз тўплай олмади. Сайловнинг иккинчи тури 21 апрель куни бўлиб ўтади. Унда амалдаги давлат раҳбари Петро Порошенко ва биринчи тур етакчиси Владимир Зеленский иштирок этади.

Эслатиб ўтамиз, 19 апрель куни икки номзод Киевдаги “Олимпийский” стадионида дебат ўтказди.

Тайёрлаган Дилшод Аскаров

#сайлов #Володимир Зеленский

2019 йилнинг 31 мартида Украинада президентлик сайловлари ўтказилади. Сайловда иштирок этиш учун 44 номзод, шу жумладан мамлакатнинг амалдаги президенти Пётр Порошенко ҳужжат топширган.