«Барселона»да чемпионлик ўйини, Англияда ЕЧЛ учун жанг. Ҳафта ўйинлари анонси

Европа миллий чемпионатларида «уфқ» кўриниб қолган бўлса-да, якуний паллада бир қатор саволлар ҳали жавобсиз қолмоқда. Германия ва Англияда ким чемпион бўлади? Италия, Англия, Испаниядан ЕЧЛдан қатнашадиган 4-ўрин учун бир қатор даъвогарлар ичида омадлиси ким? Қайси жамоаларни биз кучли бешлик чемпионатларида келаси йили кўрмаймиз? Ва яна бошқа бир қатор саволларга қисман жавоб бериш учун бизни навбатдаги ҳафта ўйинлари кутиб турибди.

БОРУССИЯ ДОРТМУНД – ШАЛЬКЕ (27 апрель, 18:30)

Бундеслигада навбатдаги тур Рур дербиси билан бошланади. Дортмунднинг «Боруссия» клуби чемпионлик пойгасида «Бавария»ни қувишда давом этади, «Шальке» эса, яна бир бор азалий рақибига халақит беришга уриниб кўради.

Гап фақат халақит беришда эмас, Чемпионлар Лигасида нимчорак финалга чиққан жамоа ички биринчиликда ўта беқарор ўйинлар кўрсатдики, Ҳуб Стевенс шогирдлари «хавфли зона»га энг яқин жамоа бўлиб турибди. 30 ўйиндан 17тасини бой берган «Шальке» «Штутгарт»ни фақат 6 очкога ортда қолдирмоқда, холос. Яъни, мағлубият уларни қўйи лигага бир қадамлик масофагача яқинлаштиради. Сўнгги 14 ўйинда атиги 1 марта ғалаба қозонган «Шальке» учун мавсумнинг сўнгги қисми ҳам осон ўтмаслиги ҳақиқатга яқинроқ бўлса керак.

Аммо гап дерби устида борар экан, жамоаларнинг формаси ва турнир жадвалидаги ўрни четга чиқиши ҳам бор гап. Буни сўнгги ўйинлар ҳам кўрсатиб турибди. Сўнгги 6 ўйинда томонлар биттадан ғалаба қозонишган бўлса, 4 ўйин дуранг билан якунланган. Биринчи даврадаги ўйинда эса, Санчонинг голи ёрдамида меҳмонлар 2:1 ҳисобида ғалаба қозонган эди.

Таркиблар борасида меҳмонларнинг ҳолати бироз ёмонроқ. Тўғри, дортмундликларда жароҳат олган уч футболчи ҳам ҳимоячидир. Ҳакими, Загаду ва Пишчек жамоага ёрдам бера олишмайди, лекин бу мавсумда «Боруссия» ҳимоячилари шу қадар кўп жароҳат олишдики, мураббий жуда кўп вариантларда ҳимояни ташкил қилиши мумкин. «Шальке» таркибида эса, Марк Ут ва Евгений Коноплянканинг ўрни жуда билинса керак.

БАРСЕЛОНА – ЛЕВАНТЕ (27 апрель, 23:45)

Ўтган ҳафтада Франция ва Италияда ниҳоят чемпион номи расман аниқланди. Бу сафар энди Испанияда ҳам соврин эгаси маълум бўлиши мумкин. Ҳозирда «Барселона» «Атлетико»дан 9 очкога олдинда бормоқда ва Испанияда аввало, ўзаро ўйинлар эътиборга олинишини назарда тутсак, бу борада устунликка эга бўлган мезбонлар шу турдаёқ чемпионга айланишлари мумкин. Балки бу ўйиндан олдинроқ ўтадиган учрашувда «Атлетико» очко йўқотадиган бўлса, каталонияликларга чемпионлик учун дуранг ҳам кифоя қилади.

Албатта, «Барселона»нинг сўнгги 10 йилда еттинчи маротаба мамлакат чемпионига айланиши вақт масаласи холос. Шундай бўлганда ҳам, бу иш «Камп Ноу»да, юз минг мухлис қаршисида, Чемпионлар Лигасидаги муҳим ўйин олдидан амалга оширилиши ҳам муҳимдир.  

Албатта, бу ўйинга кўпроқ келаси ҳафта бўлиб ўтадиган ЕЧЛ ярим финали ракурсидан қараш тўғрироқ. Табиийки, Суарес, Бускетс, Ракитич, Альба, Пике каби муҳим ўйинчиларга дам бериш керак. Месси «Алавес»га қарши сафар ўйинида майдонга тушмади ва катта эҳтимол, бу ўйинда қатнашса керак. Ҳеч бўлмаса, Мбаппе билан кетаётган «Олтин тўп» учун рақобат ҳам бунга сабаблардан бири бўлиши мумкин.

Вазиятга валенсияликлар томонидан қараганда, эътиборли жиҳатлар талайгина. Масалан, ўтган йилги баҳсни эсласангиз керак – айнан «Леванте» каталонияликларнинг мавсумни мағлубиятсиз ўтказиш орзуларини чиппакка чиқаришган ва аллақачон чемпион бўлиб улгурган жамоа устидан 5:4 ҳисобида ғалабага эришганди. Ўшанда ўйин давомида ҳисоб 5:1 кўринишига ҳам келганди, ҳатто. Иккинчидан, «Леванте» 37 очко билан 15-ўринда бормоқда ва «хавфли зона»дан атиги 3 очко олдинда, холос. Яъни, уларга лигада қолиш учун очко сув ва ҳаводек зарур.

Дарвоқе, ўша хавфли зонадаги жамоа каталониянинг бошқа бир жамоаси – «Жирона» эканини ҳисобга олсак, «Барселона» биртўла ҳамюртларига ҳам ёрдам бериб кетиши мумкин. 

ЛЕСТЕР – АРСЕНАЛ (28 апрель, 16:00)

Икки фронтда курашиш «Арсенал»га етарлича муаммоларни келтириб чиқармоқда. Унаи Эмери Европа Лигасини ютиш бўйича мутахассис бўлса-да, у олдинлари бу ишни Ла Лигада босимсиз ўйнаш мумкин бўлган «Севилья» билан амалга оширганди. Яхшиямки, «Арсенал»нинг АПЛдаги рақобатчилари ҳам яхши спорт формада эмас. Акс ҳолда, лондонликлар анча ортда қолиб кетган ва ЕЧЛга йўлланманинг ягона йўли ўлароқ фақат Европа Лигасида қолган бўларди.

Гап фақат сўнгги ойлардаги муаммода ҳам эмас, умуман «Арсенал» бу йил Англияда сафар ўйинларида жуда ёмон натижа кўрсатмоқда. «Вулверҳэмптон», «Эвертон», «Вест Ҳэм», «Саутҳэмптон» бу йили «Арсенал»ни ўз майдонида «ер тишлатишди». Умуман, сафар ўйинлари борасида «Арсенал» АПЛда 9-кўрсаткични қайд этмоқда ва бу борада ҳатто «Лестер» ҳам кўпроқ очко олишга эришган.

Эмери шогирдлари кетма-кет икки ўйинда ютқазди, аввалига «Кристал Пэлас» Лондон дербисида уч очко олиб кетди (2:3), кейин «Вулверҳемптон» ўз майдонида «тўпчилар» дарвозасига биринчи бўлимнинг ўзида 3та жавобсиз гол уришди (3:1). «Арсенал» тўртликка кириш учун энди очко йўқотишга ҳаққи йўқ, бунинг устига «Челси»нинг очко йўқотишидан умид қилиши керак бўлади. Европа Лигасидаги асосий рақобатчи ҳам айнан «Челси».

«Лестер» эса, топ-жамоаларга қарши ноқулай услуби бўлган ва ҳар қандай вазиятда хавфли ўйнай оладиган жамоалардан биридир. Ўтган йилнинг май ойида бўлиб ўтган ўйинни эслаш кифоя, ўшанда лестерликлар қийинчиликсиз 3:1 ҳисобида устун келганди.

Муҳим ўйинлар олдидан жамоанинг энг муҳим ўйинчиларидан бири Аарон Рэмзининг сафдан чиқиши эса, натижаларга сезиларли таъсир кўрсатиши мумкин. Рэмзи катта эҳтимол билан АПЛ ўйинларида майдонга тушмайди ва агар «Арсенал» Европа Лигаси финалига чиқадиган бўлса, ўша ўйинда уэльслик футболчи жамоа таркибидаги ўзининг сўнгги ўйинини ўтказиши мумкин.

МАНЧЕСТЕР ЮНАЙТЕД – ЧЕЛСИ (28 апрель, 20:30)

Англияда ЕЧЛ йўлланмаси учун кураш жуда қаттиқ кетаётгандек туюлса-да, бир томондан худди «олинг-солинг» манзиратига ўхшаб бормоқда. Чунки асосий даъвогар жамоалар мавсум сўнггида йўқотишсиз бориш ўрнига, умуман ўрин аҳамиятсиз туюлган ўртамиёналарга очко улашиш билан банд.

«Манчестер Юнайтед» кетма-кет икки турда «Эвертон» (0:4) ва «Манчестер Сити»га (0:2) мағлуб бўлди, «Челси» ҳам қолишмай, аввалига «Ливерпуль»га сафардан мағлуб бўлиб қайтди (0:2), кейин ўз майдонида «Бёрнли» билан дуранг ўйнади (2:2). Мавсум тугашига уч тур қолганда, «Челси» турнир жадвалида 67 очко билан тўртинчи, «Арсенал» 66 очко билан бешинчи, «МЮ» 64 очко билан олтинчи бўлиб жойлашган. Демак, Сульшер шогирдлари якунда «Челси»ни ортда қолдириш учун бу ўйинда ғалаба қозонишлари ва кейинги турларда ҳам лондонликларнинг очко йўқотишидан умид қилишлари керак бўлади. ЕЧЛ йўлланмаси учун эса, нафақат «Челси», балки бошқа Лондон жамоаси – «Арсенал» ҳам очко йўқотиши шарт.

Тўғри, назаримизда, энди «Манчестер Юнайтед»ни йўлланма у қадар қизиқтирмаяпти ва қайсидир маънода жамоа ўша декабрь ойига қайтиб қолгандек. Бу ерда муҳим вазифа қўлга киритиладиган очколардан ҳам кўра, эски позитив муҳитни қайтариш, сўнгги ойда рўй берган кетма-кет мағлубиятларни эсдан чиқариш ва кейинги мавсум учун ижобий пойдевор қўйишни бошлаш. Сульшер ҳам аслида шунинг учун Манчестерга ташриф буюрганди, эсингизда бўлса...

Ўзаро ўйинларга келсак, ушбу мавсумда манчестерликларнинг устунлигини кўришимиз мумкин. АПЛнинг биринчи даврасидаги ўйинда фақат сўнгги дақиқалардагина «Челси» ҳисобни тенглаштирган бўлса, февраль ойида «МЮ» «Челси»ни беш йиллик танаффусдан сўнг «Стемфорд Бриж»да мағлуб этган ва Англия Кубогидан чиқариб юборди.

Умуман олганда, ҳар икки жамоа ҳам топ-ўйинларда у қадар ишончли кўринмаяпти. «Манчестер Юнайтед» бу йил АПЛ ўйинлари доирасида топ-6 вакилларидан фақат «Тоттенҳэм»ни енга олди, холос. «Челси» эса, бу гуруҳдаги жамоаларга қарши сафар ўйинларида яхши кўрсаткичларга эга эмас – Сарри шогирдлари барча тўрт сафар ўйинини мағлубият билан якунлади.  

ЖИРОНА – СЕВИЛЬЯ (28 апрель, 17:00)

Испанияда чемпион номи деярли аниқ бўлиб улгурган бўлса-да, Чемпионлар Лигасига йўлланма берадиган 4-ўрин учун ҳам, турнирда ўз ўрнини сақлаб қолиш учун кураш ҳам авжига чиққан.

«Севилья» «Хетафе» билан тенг очко жамғарган ҳолда, фақат ўзаро ўйинлар натижасига кўра пастроқда жойлашиб қолди ва энди ҳар бир ўйинни ғалаба билан якунлаши ва «Хетафе»нинг очко йўқотишидан умид қилиши керак бўлади. Бу сафарги рақиби «Жирона» эса, жадвалнинг қўйи қисмида ва бу клуб ҳам кескин рақобат ичида. Каталония жамоаси лигада қолиши учун турнир жадвалида юқорига кўтарилиши шарт. Қизиғи, «Жирона» бу ўйиндан кейин «Севилья»нинг «кучли тўртлик» учун рақиби «Хетафе»га меҳмонга боради. Кейин эса, лигада қолиш учун кураш олиб бораётган бошқа бир клуб – «Леванте»ни қабул қилади. Хуллас, жамоанинг кейинги турлардаги ҳар бир ўйини бизнинг анонсимиздан ўрин олса керак.

Қаторасига етти ўйиндан бери фақат мағлубиятга учраётган «Жирона» учун имкониятлар кўп қолмаяпти ҳам. Шу билан бирга, «Жирона» ўша ғалабасиз ўйинларда ҳам у қадар кучсиз кўринмаган ва 6 ўйиндан 5тасида минимал ҳисоб қайд этилганди. Лекин «Севилья» «Жирона» учун жуда ноқулай рақиб, Ла Лигада бўлиб ўтган барча уч ўйинда ҳам андалусияликларнинг қўли баланд келган. Бу ўйинларда «Жирона» бирорта ҳам гол ура олмаган.

Мезбонларга икки жиҳат ёрдам бериши мумкин. Биринчидан, «Севилья» таркибидаги бир қатор муҳим футболчилар бўлмиш Андре Сильва, Гоналон, Вёбер, Нолито кабилар майдонга туша олишмайди. Иккинчидан, «Севилья» бу мавсумда сафар ўйинларида у қадар ишончли кўринмаяпти ва 17 ўйиндан атиги 5тасида ғалаба қозониб, бу кўрсаткич бўйича 10-ўринда бормоқда. Қизиғи, сафар ўйинлари борасида «Жирона» анча устун саналиб, аксинча, уйда бўлиб ўтган ўйинларда ўта беқарор – Эйсебио Сакристан шогирдлари мезбонлик қилган 17 ўйиндан атиги 2тасида ғалаба қозонишган, холос. Лигада энг ёмон кўрсаткич.

ТОРИНО – МИЛАН ( (28 апрель, 23:30)

А Сериядаги сўнгги 6 ўйинда атиги бир марта ғалаба қозонган «Милан» турнир жадвалида деярли пастламаган бўлса-да, рақобатчи бўлиши мумкин бўлган ҳамма жамоани энг яқин масофага яқинлаштириб бўлди. «Аталанта» ва «Рома» очколар бўйича ҳам деярли етиб олди, «Лацио» билан ҳам 4 очколик масофа бор. Бу сафарги рақиб «Торино» эса «Милан»дан уч очко кам жамғарган, холос. Демак, натижалар борасида ҳар доимгидек беқарор кўрсаткичларга эга бўлган «Милан» учун мавсум охири ҳал қилувчи мақомда бўлади. Гаттузо шогирдлари бу ўйинларда ғалаба қозониб, 4-ўринни сақлаб қолишлари ва узоқ танаффусдан сўнг ЕЧЛга қайтишлари мумкин. Шу билан биргаликда, муваффақиятсиз ўйинлар «Милан»ни 8-ўринга ҳам тушириб юбориши ҳеч гап эмас. А Сериядаги натижалар кескин пасайган ва бунинг устига кечагина Италия Кубогида финал остонасида қоқилган «Милан» учун ҳал қилувчи палла яқинлашмоқда.

«Торино» эса, юқорида айтилганидек, кучли тўртликка жуда яқин. Бунга ўзига хос муваффақиятли серия – сўнгги 13 ўйинда атиги 1 мағлубият билан кўрсатилган натижалар сабабчи бўлди. Тўғри, бу ўйинларнинг кўпи дуранг билан якунланди, лекин шундай беқарор рақобатчилар ёнида бу натижалар ҳам олдинга силжиш учун етарли эди. Дарвоқе, дуранглар ҳақида сўнг борганда, «Милан» ва «Торино» ўртасидаги охирги 4 учрашув ҳам дуранг ҳисобда якунланганини таъкидлаш мумкин.

Бир тарафдан, сўнгги 15 ўйинда туринликлар «Милан» устидан ғалаба қозона олмаётгани меҳмонларга умид учқунларини намойиш этса, бошқа тарафдан, миланликлар «Торино» майдонида 2012 йилдан бери ғалаба қозона олмаётганликларини ҳам эслатиб ўтиш мумкин. Мана шундай бир-бирига қарши анъаналар ҳам бу ўйин жуда қизиқарли ўтишидан далолат қилмоқда.

БОШҚА ЎЙИНЛАР
26 апрель. «ЛИВЕРПУЛЬ» – «Ҳаддерсфилд» (23:55)
27 апрель. «ТОТТЕНҲЭМ» – «Вест Ҳэм» (16:30), «АТЛЕТИКО» – «Вальядолид» (19:15), «ИНТЕР» – «ЮВЕНТУС» (23:30)
28 апрель. «Бёрнли» – «МАНЧЕСТЕР СИТИ» (18:05), «Нюрнберг» – «БАВАРИЯ» (21:00), «Райо Вальекано» – «РЕАЛ» (23:45).