Месси ҳал қилувчи голни уриб, «Барселона»нинг Испанияда 26-марта чемпион бўлишини таъминлади

Испания Ла Лигасининг 35-турида «Барселона» ўз майдонида «Леванте» устидан зафар қучиб, муддатидан аввал чемпионликни қўлга киритди. Каталония клубининг 26-марта чемпион бўлишини таъминлаган ўйинда ягона голни 62-дақиқада Лионель Месси урди.

Қайд этиш жоизки, жамоа сардори Лионель Месси ўйинни захира ўриндиғида бошлади. Иккинчи бўлимда Коутиньонинг ўрнига тушган Месси ўйинда барибир ўз сўзини айтди.

91 мингдан зиёд мухлис кўз ўнгида 26-марта Испания чемпионати ғолиби бўлган «Барселона» бу борада фақатгина 33 марта чемпион бўлган Мадриднинг «Реал» клубидан ортда қолмоқда. Бироқ, Барселона XXI асрда (10) ва сўнгги ўн йилликда (6) чемпион бўлиш борасида етакчи бўлиб турибди.

2017 йилда клуб рулига келган мураббий Эрнесто Вальверде ўзи бошқарган ҳар икки мавсумда ҳам чемпионликни расмийлаштиришни уддалади.

Бу каталонлар клуби сўнгги 11 мавсумда саккизинчи бор чемпион бўлишидир.

Бу вақт ичида «Барселона»дан ташқари фақат «Реал» (икки марта, 2011/12 ва 2016/17 йилги мавсумларда) ҳамда «Атлетико» (2013/14 йилги мавсум) Испания чемпионлигига эришган

Испания Ла Лигаси. 35-тур
БАРСЕЛОНА – ЛЕВАНТЕ 1:0 (0:0)
Гол: Месси (62).
Барселона: тер Штеген, Пике, Лангле, Нелсон Семеду, Альба, Артур (Бускетс, 73), Ракитич, Коутиньо (Месси, 46), Видаль, Дембеле (Сержи Роберто, 84), Суарес.
Леванте: Фернандес, Рубен Везу, Робер, Луна, Коке, Рочина (Марти, 84), Кампанья, Жейсон, Вукчевич (Барди, 65), Саймон (Моралес, 46), Майораль.
Огоҳлантиришлар: Ракитич (14), Рочина (56), Рубен Везу (58), Пике (70), Нелсон Семеду (77), Коке (83), Бускетс (90).