Ғарб маданияти тарихидаги энг бой одам маълум қилинди 

Америкалик иқтисодчи Сэмюэль Уильямсон нефть магнати Жон Рокфеллерни ғарб маданияти тарихидаги энг бой одам деб атади.

Тадбиркор XIX ва XX асрлар бўсағасида 1,5 млрд долларлик бойлик тўплаган. Ҳозирги вақтда бу қиймат тахминан 26 млрд долларни ташкил қилган бўларди. Рокфеллер тўплаган бойлик ўша вақтда АҚШ ялпи ички маҳсулотининг 1,6 фоизини ташкил қилган. Агар бу мутаносиблик сақланиб қолса, Рокфеллернинг бойлиги замонавий тарихдаги энг бой одам – Жефф Безоснинг бойлигидан 3 марта кўпроқни ташкил қилган бўларди. Ҳозирда Amazon асосчисининг бойлиги тахминан 117 млрд долларга баҳоланади.      

Уильямсоннинг таъкидлашича, ўтмишнинг бой одамлари – тадбиркорлар, қироллик оилалари аъзолари ва Рим саркардаларининг бойликлари замонавий миллиардерларникидан анча кўпроқни ташкил қилган бўларди. Америкалик иқтисодчи турли замонларнинг энг бой одамлари молиявий кўрсаткичларини уларнинг бойликлари миқдори ва ўша вақтдаги давлат ялпи ички маҳсулоти нисбати орқали таққослайди.

Forbes рўйхатидан ўрин олган бошқа миллиардерлар ҳам ўтмишнинг етакчи тадбиркорлари билан бойлик борасида баҳслаша олмаган бўларди. Мисол учун, бугунги кунда пўлат ишлаб чиқарувчи Эндрю Карнегининг бойлиги Уильямсон услуби бўйича 300 млрд долларга яқинни, темир йўл магнати Корнелиус Вандербильтники эса 200 млрд долларга баҳоланган бўларди. Ўз навбатида, Спартак исёни ғолиби, Қадимги Рим саркардаси Марк Лициний Красснинг бойлиги 210 млрд долларга баҳоланарди.