«Арсенал» ва «Челси» ЕЛ финали учун ўзларига ажратилган чипталарнинг ярмини ҳам сота олмади

Европа лигаси финалига чиққан Лондоннинг икки клуби ўзаро учрашув учун ўзларига ажратилган чипталарнинг бир қисмини қайтариб берадиган бўлди.

The Times хабарига кўра, «Арсенал» ва «Челси» жами 6000тадан кўпроқ, мос равишда 3500 ва 2000тадан чиптани реализация қила олмаган.

Маълум бўлишича, УЕФА финал иштирокчиларига 5800тадан чипта ажратган. Бу – Бокудаги «Олимпия» стадиони сиғимининг 10 фоизидан камроғини ташкил этади. Мусобақа ташкилотчиси Озарбойжон пойтахтига етиб бориш имконияти чеклангани туфайли шундай қарорга келган.

Қолаверса, УЕФА ҳомийлари ҳам ўзларига тегишли 2000та чиптанинг барчасини тарқатиб тугата олмаган, шу боис маълум қисмини УЕФАга қайтариб юборишига тўғри келган.

Инглиз клублари ва ҳомийлар қайтариб берган чипталар эндиликда Озарбойжонда маҳаллий мухлислар учун сотувга чиқарилади. Ҳозиргача мезбон мамлакатда 23 мингдан ортиқ чипта сотилган. Қўшимча билетларга талаб бор-йўқлиги номаълум.

Қайд этилишича, Бокуга авиарейсларнинг камлиги, мавжуд самолёт чипталарининг ҳам нархи қимматлиги, парвоз вақтининг узоқлиги, виза билан боғлиқ муаммолар ва ўйиннинг кеч вақтга белгилангани (маҳаллий вақт билан соат 23:00) каби омиллар туфайли мухлислар финални бевосита томоша қилиш истагидан воз кечишмоқда.

Аввалроқ «Ливерпуль» бош мураббийи Юрген Клопп «Бокудаги меҳмонхоналарда 100 фунтлик номерларнинг нархи 2700 фунтга кўтарилиб кетгани»ни эшитгани ҳақида айтган эди.

Шунингдек, «Арсенал» бир неча маротаба УЕФА еврокубок финали учун Боку шаҳрини танлаганини танқид қилиб чиқди.