Испанияда Ла Лига клуби президенти ва қатор футболчилар ҳибсга олинди

Испания полицияси Примера ва Сегунда клубларининг бир қатор футболчиларини ҳибсга олди. Қўлга олинганлар келишилган ўйинларда иштирок этганликда гумонланмоқда.

Servimedia телеканалининг ҳуқуқ-тартибот органларидаги манбасига асосланиб хабар беришича, ҳибс этилганлар орасида «Реал» клуби ва Испания миллий жамоасининг собиқ ҳимоячиси Рауль Браво ҳам бор. Ундан ташқари, Борха Фернандес («Реаль Вальядолид»), Самуэль Сайс Алонсо («Хетафе»), Иньиго Лопес Монтанья («Депортиво Ла-Корунья») ва Сегунданинг бир нечта клубларида тўп тепган собиқ ҳужумчи Карлос Аранда ҳам қўлга олинган.

Шунингдек, полиция «Уэска» клуби офисида тинтув ўтказган ҳамда клуб президенти Августин Ласаоса ва тиббиёт хизмати бошлиғи Хуан Карлос Галиндони ҳибсга олган.

EFE агентлигининг ўз манбаларига таяниб маълум қилишича, юқоридаги шахслар уюшган жиноий гуруҳ тузиш, коррупция ва пул ювиш каби жиноятларда айбланмоқда.

Маълумот учун, 2018/19 мавсумида «Уэска» ўз тарихида илк марта Ла Лигада иштирок этди ва 19-ўринни банд этиб, яна Сегундага қайтди.