Россия Ўзбекистондаги аэропортларни ҳам модернизация қиладиган бўлди

Россияга қарашли «Новапорт» компанияси Ўзбекистоннинг Самарқанд, Наманган ва Урганч аэропортларини модернизация қилиш бўйича шартнома имзолади. Бу ҳақда «Коммерсантъ» хабар берди.

Қайд этилишича, «Новапорт» Uzbekistan Airways’га тегишли бўлган юқоридаги уч аэропортни модернизация қилиш ва ривожлантириш билан шуғулланади. Нашрнинг «Новапорт»даги суҳбатдошлари сўзига кўра, ҳолдинг капиталда иштирок этиш учун даъвогар эмас: гап концессия ҳақида кетмоқда: «Консалтинг компаниялари шартларни ишлаб чиқиш учун жалб қилинади, иш тўрт ой давом этади». Ҳолдинг на инвестициялар ҳажмини, на ўзгаришлар кўламини ошкор қилмаган.

Самарқанд аэропорти биринчи навбатда реконструкция қилиниши керак: 2022 йилда шаҳар Шанхай ҳамкорлик ташкилоти саммитини қабул қилади. Наманган ва Урганч аэропортларини модернизация қилиш учун кўпроқ вақт ажратилди: тахминан беш йил.

Таъкидлаш жоизки, «Новапорт» компанияси активида қуйидаги аэропортлар бор:

1. Чита халқаро аэропорти
2. Челябинск халқаро аэропорти
3. Томск халқаро аэропорти
4. Астрахань халқаро аэропорти
5. Волгоград халқаро аэропорти
6. Новосибирск халқаро аэропорти
7. Тюмень халқаро аэропорти
8. Мурманск халқаро аэропорти
9. Пермь халқаро аэропорти
10. Кемерово халқаро аэропорти
11. Минеральные Воды халқаро аэропорти
12. Калининград халқаро аэропорти.

Бундан олдин, Ўзбекистон яна бир йўналишда Россия билан ҳамкорлик қилиши хабар берилганди.