Хосе Антонио Рейес ЙТҲ оқибатида вафот этди

Испания миллий жамоасининг собиқ яримҳимоячиси Хосе Антонио Рейес бугун, 1 июнь куни 35 ёшида вафот этди.

«Севилья» клуби расмий твиттерида тасдиқланишича, у йўл-транспорт ҳодисаси қурбони бўлган. Ҳозирча ЙТҲ тафсилотлари маълум эмас.

Рейес «Севилья» тарбияланувчиси эди. У ушбу клубдан ташқари «Арсенал», «Реал», «Атлетико», «Эспаньол», «Кордоба» ҳамда Хитойнинг «Синьцзян Тяньшань Леопард» клубларида ўйнаган. 2019 йилдан Хосе Антонио Сегунданинг «Эстремадура» жамоасида тўп тепганди.

Рейес – клуб футболида жами 11та совринни қўлга киритган, Англия ва Испания чемпиони бўлган. У АПЛда олтин медаль олган илк испаниялик футболчи саналади. Шунингдек, Рейес «Севилья» ва «Атлетико» таркибида 5 маротаба Европа лигасида ғолиб чиққан, бу – мусобақа тарихидаги рекорд кўрсаткичдир.

Хосе Антонио Рейес Испания миллий жамоасида 22та ўйин ўтказиб, 4та гол урган; ЖЧ-2006да иштирок этган.