Мадуро Угандада тонналаб олтинни яширмоқда – ОАВ

Венесуэла президенти Николас Мадуро олтин захираларини мамлакат ташқарисига олиб чиқишга уринмоқда. Бу ҳақда The Wall Street Journal нашри хабар берди. 

Венесуэла вакилларининг таъкидлашича, бозор нархи 300 млн долларлик 7,4 тонна олтин иккита самолётда Угандадаги нефтни қайта ишловчи заводга етказилган.

Олтин ёмбилар белгиланган манзилга Россиянинг чартер лайнерларида келтирилган. Таъкидланишича, баъзи ёмбиларда Венесуэла марказий банки муҳри бор.

Уганда полицияси маълумотларига кўра, Энтеббега келтирилган олтин заводда қайта ишланиб, кейин Яқин Шарққа экспорт қилинган.

Халқаро мутахассисларнинг фикрича, олтиннинг ноқонуний транспортировкаси Мадурога ҳокимиятни ушлаб туришда ёрдам берувчи унинг хуфиёна иқтисодиётининг бир қисми ҳисобланади.

Аввалроқ Sardes турк фирмаси Мадурога Венесуэладан 900 млн долларлик олтинни олиб чиқиб кетишда ёрдам бергани маълум қилинганди.