Ўзбекистонда ҳолдинг компанияларини икки марта солиққа тортиш бекор қилинади — Отабек Назиров

Капитал бозорини ривожлантириш агентлиги директори Отабек Назиров Kun.uz'га берган эксклюзив интервьюсида капитал бозорда хусусий сектор ролини ошириш учун айрим масалаларга эътибор қаратиш лозимлигини таъкидлади.

Видео: Youtube

Видео: Mover (tas-ix)

«Янги инвесторлар томонидан ҳисоб бўйича талаблар аниқ таъкидланиши лозим. Бу компаниялар масъулиятини оширади. Хусусий секторнинг бизнес режа ва ҳаракатланиш стратегияси бўлиши керак.

Капитал бозоридан пул жалб этиш учун компания ликвидлиги муҳим. Масалан, битта эмиссия 100 миллиард сўмга яқин бўлса, кутилган натижа қўлга киритилади. Ундан кам ҳажмда акциялар чиқса, ликвидлик пайдо бўлмайди. Ўзбекистонда бундай салоҳиятга эга корхоналар кўп эмас. Тадбиркор турли важлар билан бизнесни бўлиб ташлаган, ҳолдинг компаниялар кўп тузилмаган. Негаки, ҳолдинг компаниялар учун алоҳида солиққа тортиш мавжуд.

Айни масала устида ишлаб, яқин кунларда ҳолдинг компанияларни икки марта солиққа тортиш амалиёти бекор қилиниши кутилмоқда», — дейди агентлик директори. 

Маълумот учун, ҳолдинг компанияси (инглиз тилидан «эгалик») асосий фаолияти давомида корхоналарнинг акцияларини ўз тасарруфига олиш орқали уларнинг ишини назорат қилади ва умумий қийматдаги акцияларни бозорга чиқариши мумкин.