Nissan 12 000 ишчини бўшатади – даромад 99 фоизга тушиб кетди

Япониянинг Nissan автомобиль ишлаб чиқарувчи компанияси тугаган чоракдаги молиявий кўрсаткичларнинг «оёғи осмондан» келганини маълум қилди. Бунинг натижасида ишчилар сони кескин қисқартирилади. Бу ҳақда компания ҳисоботида маълум қилинган. 

Япониянинг иккинчи энг йирик автомобилсозлик компаниясига кўра, жорий молия йилининг биринчи чорагида даромад кескин тушиб кетган. Амалий даромад кўрсаткичи ўтган йилнинг шу даврига 99 фоиз камайган. 

Соф йиллик даромад миқдори эса, бир йил аввалги кўрсаткич билан таққослаганда, 13 фоизга тушиб кетган. Шу муносабат билан, Nissan (NSANF) дунё бўйлаб ўз заводларида 12 500 иш ўрнини қисқартиришини эълон қилмоқда. Бу рақам, компаниянинг май ойида ишдан бўшатишларни режалаштираётгани ҳақидаги баёнотида кўрсатилган рақамдан икки карра ортиқдир. 

Шунингдек, компания 2022 молия йили охирига келиб, ишлаб чиқариш ҳажмини камида 10 фоизга қисқартиради. Компания ижрочи директори Hiroto Saikawa маълум қилишича, Индонезия ва Испаниядаги ишлаб чиқариш линиялари ҳам аллақачон тўхтатилган. 

Аввалроқ, Япония компанияси Буюк Британияда люкс моделлар ишлаб чиқаришни тўхтатган эди. 

Умуман олганда, Nissan дунёнинг бошқа автомобилсозлик компаниялари сингари, оғир кунларни бошдан кечирмоқда. Заиф глобал иқтисодиёт, АҚШ-Хитой савдо уруши ишлаб чиқарувчилар учун катта зарар келтирмоқда. Иқлим ўзгаришлари сабабли киритилаётган янги экологик талаблар ҳам саноат ривожига тўсқинлик қилмоқда. 

Шу билан бирга, Nissan АҚШ ва Европа бозорларидаги улушини йўқотмоқда. Мисол учун, компания биринчи чоракда АҚШда 351,000 дона автомобиль сотган, бу бозорнинг 7,1 фоизи демакдир. Ўтган йили бу рақам 8.1 фоизни ташкил этар эди. Компаниянинг Европадаги савдолари, Россияни қўшиб ҳисоблаганда, бир йил аввалгига қараганда 16 фоизга пасайган.