Қон, олов ва ўқлар. Қўй-Тош воқеаларида илк қурбон, яна 36 киши шифохонада

Қирғизистон Миллий хирургия марказига Қўй-Тошдаги отишмалар вақтида жароҳатланган яна бир киши ётқизилди. У ўнг курак суягида ўточар қуролдан  жароҳат олган, шунингдек чап бел қисмида тирналган-кесилган жароҳат қайд этилган. У жарроҳлик амалиётидан ўтказилган ва алоҳида палатага ётқизилган.

Маҳаллий вақт билан соат 00:55 ҳолатига кўра, тиббиёт муассасаларига Қўй-Тошдан турли даражадаги жароҳатлар (ўточар қуролдан олинган жароҳат, бош мияга оид жароҳат, бош мия чайқалиши) билан жами 36 киши келтирилган, шундан 15 нафари ҳуқуқ-тартибот органлари ходимларидир.

Бишкек шошилинч тиббий ёрдам кўрсатиш маркази директори Искандар Шаяхметовнинг маълум қилишича, махсус топшириқли бўлинма ҳарбийларидан бири операция қилинган, аммо шифокорларнинг саъй-ҳаракатларига қарамай у вафот этган.

7 август куни мамлакатнинг собиқ президенти Алмазбек Атамбаевнинг Қўй-Тошдаги қароргоҳи махсус топшириқли бўлинма ҳарбийлари томонидан қамал қилинди, ҳарбийлар Атамбоев ва унинг тарафдорлари турган уйга бостириб киришди ва резина ўқлар билан йиғилганларни тарқатиб юборишга уринди. Аммо собиқ президентни қўллаб-қувватловчилар сони ортди ва жавоб қайтарилди. Натижада, ҳарбийларнинг бир қисми воқеа жойидан чекинди, бир қисми собиқ президент тарафдорлари томонидан қўлга олинди.

Интернетда қўлга олинган ҳарбийлар тасвирланган видеолар пайдо бўлди.

Жароҳатланганлар орасида Атамбоевнинг адвокати Нурбек Касимбеков, собиқ депутат Мээрбек Мискенбаев, Давлат хавфсизлик хизматининг собиқ раиси Абдил Сегизбаев ҳам бор.

Айни вақтда Атамбоевнинг атрофида минглаб тарафдорлари тўпланган ва улар пойтахт Бишкек томон юришмоқчи. Қирғизистоннинг амалдаги президенти Сооронбой Жээнбеков таътилини барвақт тугатиб пойтахтга қайтган.