Ҳуқуқшунос: «Улар Нодира Қодировани фоҳишаликда айблаш орқали ўзларини оқлаб олишмоқчи»

Турк депутати Ширин Уналнинг уйида ўзини отиб қўйган Нодира Қодирова ишига боғлиқ яна бир шубҳали ҳолат ўртага чиқди.

Маълум бўлишича, полиция ходимлари марҳумнинг яқинлари берган айрим кўрсатмаларни қабул қилишни истамай, улардан ўз гапларини қайтариб олишларини сўраган.

Нодира Қодирова оиласининг ҳуқуқшуноси, Болалар ва аёллар биринчи номли ассоциация раҳбари Мужде Тозбей Эрден Bianet`га берган интервьюсида шу ҳақда айтиб ўтди.

«Сизлар уларни нотўғри айблаяпсиз», дейиш билан Нодиранинг дўстлари ва акасидан ўз эътирозлари ҳамда кўрсатмаларини қайтариб олишлари учун уринган полиция офицерларига чора кўрилиши лозим», – дейди Тозбей.

Ҳуқуқшуноснинг сўзларига кўра, мазкур ҳолатга прокуратура суицид деб баҳо бермай туриб, полиция тезда ана шундай эълон бергани ҳам шубҳалидир.

«Одатда, аёл киши вафот этган ҳолатларда ўлим ўз жонига қасд қилиш оқибатида рўй берганми ёки йўқ, деган саволга суд-тиббий экспертизаси хулосасига таяниб прокуратура жавоб берарди. Қодированинг суициди билан боғлиқ ҳолатда эса буни полиция департаменти эълон қилгани дастлабки гумонларни келтириб чиқаряпти», – деб қайт этди у.

«Нодира қай тарзда ўз жонига қасд қилгани, ўлимидан бир кеча олдин дугоналаридан бирига жинсий тегажоғликка учрагани ҳақида айтгани, Анқара шаҳар прокуратураси мурдани ёриб кўриш ва суд-тиббий экспертизаси хулосасини тезда олиб, жасад Нодиранинг ватанига юборилгани, бу ишлар учун қоғозбозликка икки кунгина вақт етарли бўлгани бу ўлим борасида шубҳа-гумонларни туғдиряпти», – дея фикр билдирди Мужде Тозбей Эрден.

Унинг қўшимча қилишича, яна бошқа бир қатор ҳолатлар ҳуқуқни муҳофаза қилувчи органлар депутат Ширин Унални ҳимоя қилаётганини кўрсатмоқда.

Ҳуқуқшунос прокуроратуранинг марҳум ва унинг дугонасига нисбатан фоҳишалик айбловини илгари сурганига ҳам муносабат билдирди.

«Агар Нодира фоҳишалик билан шуғулланган бўлганида ҳам, бунинг ишга боғлиқлик жойи йўқ. Бу ерда гап унинг ўлими ва жинсий тажовузга учрагани бўлиши мумкинлиги ҳақида кетмоқда. Ҳеч ким унга нисбатан бундай қилишга ҳаққи йўқ эди.

Қолаверса, Нодира кўзида ёш билан дўстига: «Акамнинг кўзига қандай қарайман энди», деб айтган. Бу – жинсий зўравонлик рўй бергани ва у олдин жинсий муносабатларда бўлмаганини англатувчи муҳим далил.

Нодира фоҳишалик қилганми-йўқми, дея савол бериш – терговни Нодиранинг ўзига қарши қаратишга бўлган уринишдир. Улар терговнинг боришини ўзгартириб, ўзларини оқлаб олишмоқчи. Аммо Нодирага тухмат қилиб бўлмайди, биз унинг номини булғай олмаймиз. 

Фикримизча, бу шубҳали ўлим ишини ёпиб юборишга ҳаракатлар бўляпти», – дея хавотир билдирди Болалар ва аёллар биринчи ассоциацияси раҳбари.

Мавзуга оид:

Ўзбекистонлик қиз Туркия парламенти депутатининг уйида ўзини отиб қўйди. Марҳумнинг акаси полиция хулосасидан шубҳада

Нодира Қодирова иши. Яқинлари марҳумнинг зўрланганини тахмин қилаётган бир пайтда прокурор уни фоҳишаликда гумон қиляпти

Нодира Қодирова иши. Туркия парламентининг мухолиф депутати Адлия вазиридан 6та саволга жавоб талаб қилди

ТИВ: Нодира Қодированинг ўлими билан боғлиқ вазият назорат остида