Эрдўған Сурияда "Тинчлик булоғи" операцияси давом этиши мумкинлигини айтди

Фото: REUTERS

Унинг сўзларига кўра, "охирги террорчи минтақани тарк этмагунича" Туркия бу фикридан қайтмайди.

Туркия президенти Ражаб Тоййиб Эрдўған Туркиянинг Суриядаги "Тинчлик булоғи" операцияси давом этиши мумкинлигини истисно қилмади.

"Шубҳасиз. Охирги террорчи минтақани тарк этмагунича бу ишни тўхтатмаймиз. Суриядан бошқа давлатлар чиқиб кетмагунича биз у ерни тарк этмаймиз. Биз Суриянинг ҳудудий яхлитлиги ва бирлигини қўллаб-қувватлаймиз", - деди Эрдўған журналист саволига жавобан.

Шу билан бирга, Туркия раҳбари Анқара Суриянинг "бўлиниб кетишини хоҳламаслигини" таъкидлади.

У Туркия Адана келишувига асосан операция ўтказишга ҳақли эканлигини айтди.

"Агарда минтақа террорчи ташкилотлардан тозаланмайдиган бўлса, биз Адана келишуви доирасида операцияни давом эттирамиз", - деди Эрдўған.

Тайёрлаган Дилшод Аскаров

#Сурия #Ражаб Тоййиб Эрдўған

Туркия 9 октябрь куни Сурия шимолидаги курдларга қарши қуруқликдаги ҳарбий кампания бошлади. «Тинчлик булоғи» номли амалиётдан мақсад - Туркия чегаралари яқинида террорчилар учун йўлак қолдирмаслик ҳисобланади