Саъд аш-Шеҳри: «Ўзбекистон билан ўйинда хато қилсангиз, бу қимматга тушади»

Осиё чемпионати-U23 яримфиналидан ўрин олган Ўзбекистон ҳамда Саудия Арабистони жамоалари ўртасидаги ўйиндан аввал ҳар икки жамоанинг бош мураббийлари иштирокида матбуот анжумани ўтказилди. Унинг биринчи қисмида қатнашган Саудия устози Саъд аш-Шеҳри ўйин ҳақида саволларга жавоб берди.

«Бизнинг мақсадимиз олимпиада ўйинларига йўлланма олиш, шу боис бу баҳсга тайёрмиз. Бизни Ўзбекистонга қарши жуда қийин ўйин кутиб турибди. Рақибда кучли жамоа, кучли футболчилар бор. Аммо бизда ҳам кучли футболчилар йиғилган.

Биз Таиландни қийинчилик билан енгдик, аммо ўша баҳсда ўз характеримизни кўрсата олдик. Ўзбекистонга қарши ўйин олдидан бизда дам олиш учун бир кун кўпроқ вақт бўлди ва умид қиламан бу фойдамизга ишлайди.

Бизнинг бу авлоддаги футболчилар билан режаларимиз кўп, жамоада яхши йигитлар йиғилган. Уларнинг олимпиадага чиқиши ва катта совринни қўлга киритиши келажак учун муҳим. Бу соврин айнан ҳозирги Осиё чемпионати кубоги бўлишини хоҳлайман.

Ўзбекистонга қарши ўйинларда хато қилсанг, бу сенда муаммолар туғдиради. Рақиб сафидаги футболчиларнинг кучлилигини яна бир бор такрорламоқчиман. Аммо бизнинг рақибдан кучлироқ жиҳатларимиз бор ва улардан фойдаланишга ҳаракат қиламиз»,— деб мураббийнинг сўзларини келтирмоқда Tribuna.uz мухбири.