Уханда коронавирус билан курашиш учун иккинчи шифохона қурилади. 25 та провинцияда фавқулодда вазият эълон қилинди

Хитой ҳукумати янги турдаги коронавирус тарқалиши ўчоғи ҳисобланган Ухань шаҳрида ушбу вирусга чалинганларни даволаш учун зудлик билан иккинчи махсус шифохонани қуришга қарор қилди. Бу ҳақда The Global Times нашри хабар берди. 

Шифохона 1,3 минг беморга мўлжалланиб, у ярим ой ичида қуриб битказилади.

23 январда Уханда шундай илк шифохона қурилиши бошлангани маълум қилинганди. Минг кишига мўлжалланган шифохона 3 февралгача тайёр кўринишга келтирилади.

Охирги маълумотларга кўра, коронавирусдан Хитойда вафот этганлар сони 41 нафарга етди. Унга чалинганлар сони эса 1,3 минг кишини ташкил қилмоқда.  

Коронавирус тарқалиши олдини олиш учун 26 январдан провинциялараро автобуслар ҳаракати тўхтатилди. 28 та провинциядан 25 тасида аҳоли саломатлиги билан боғлиқ фавқулодда вазиятларга жавоб беришнинг энг юқори даражаси эълон қилинди. Бу ҳудудлардаги аҳолининг умумий сони 1,2 млрддан ошади.

Дастлаб ушбу чора Ухань жойлашган Хубэй провинциясида киритилган, сўнгра унга марказий бўйсунувдаги Пекин, Шанхай, Чунцин ва Тяньцзинь шаҳарлари, Гуандун, Хэнань, Хунань, Чжэцзян, Анхой, Цзянси, Сичуань, Шандун, Юннань, Гуйчжоу, Фуцзянь, Цзянсу, Хайнань, Хэйлунцзян, Хэбэй, Ганьсу, Ляонин, Шаньси провинциялари, Шинжон-Уйғур ва Гуанси-Чжуан мухтор туманлари қўшилган.

Бундан ташқари, Хитойнинг махсус маъмурий ҳудуди ҳисобланган Ҳонгконгда ҳам фавқулодда вазиятларга жавоб беришнинг энг юқори даражаси киритилган. 

Шунингдек, Хитойдаги барча туристик компаниялар ва онлайн-агентликлар мамлакатга туристик турларни вақтинчалик тўхтатишди.  

Таъкидланишича, Хитойда бўлган сайёҳлик гуруҳлари ўз саёҳатларини давом эттиришлари мумкин, бироқ улар хавфсизлик ва сайёҳлар саломатлигига алоҳида эътибор қаратишлари лозим бўлади.

Хитой раиси Си Цзиньпин коммунистик партия марказий қўмитасининг коронавирус тарқалиши билан боғлиқ ҳолда чақиртирилган йиғилишида коронавирусга қарши курашаётган барча тиббий ходимларга миннатдорлик билдирди.

“Раис Си Цзиньпин Хитой коммунистик партияси марказий қўмитаси номидан касалликнинг тарқалишига қарши мардонавор курашаётган барча тиббий ходимларга миннатдорлик билдиради”, дейилган йиғилиш якунларига кўра тарқатилган баёнотда.

Хитой етакчиси касаллик оқибатида яқинларини йўқотганларга ҳамдардлик билдирган.

“Бутун партия, армия ва кўп миллатли халқимиз сиз билан, у сизнинг таянчингиз”, деб қўшимча қилган Хитой раиси. 

Си Цзиньпин касалликнинг тарқалиши олдини олиш ва назорат қилиш бўйича мувофиқлашган ишни мустаҳкамлаш, дори воситаларининг узлуксиз таъминоти бўйича ишни фаоллаштириш, тиббий персонал ҳимоясини кучайтириш, жамоатчилик барқарорлигини таъминлаш зарурлигини таъкидлаб ўтган.