Россия Хубэй вилоятидан ўз фуқароларини эвакуация қилишни бошламоқда

Россия коронавирус тарқалиши билан боғлиқ вазият сабабли Хитойнинг Хубэй вилоятидан ўз фуқароларини эвакуация қилиш чора-тадбирларини бошлаганини маълум қилди.

Бу ҳақда Россия ташқи ишлар вазирлиги хабар бермоқда.

Хубэй вилоятидан мустақил равишда чиқиб кетишнинг иложи йўқ, чунки ҳудудда карантин жорий этилган.

31 январь куни Россияда коронавирусга чалиниш бўйича дастлабки икки ҳолат қайд этилди. Мамлакат бош вазири ўринбосари Татьяна Голикованинг маълум қилишича, коронавирус сабабли Россия-Мўғулистон чегарасини кесиб ўтиш чекланган ҳамда Ухань шаҳри ва Хубэй вилоятини тарк этишни истаган россияликларни эвакуация қилиш бошланади. Унинг сўзларига кўра, Уханда 300, Хубэйда 341 нафар Россия фуқароси бор.

Эвакуация қилинган фуқаролар Россияда аэропортга қўнишлари биланоқ қўшимча эпидемиологик назоратдан ўтказилади.

31 январь ҳолатига Хитойда жами 9720 нафарни ташкил қилган, 1500 нафар киши оғир ҳолатда даволанмоқда, 213 нафар киши ушбу касалликдан вафот этган.

Жаҳон соғлиқни сақлаш ташкилотининг Халқаро тиббий санитария қоидалари сайтидаги маълумотларга кўра, 31 январь кунига коронавирус инфекциясига чалиниш дунёнинг 20 та давлатида қайд этилган.

Тайёрлаган Дилшод Аскаров

#Россия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.