Ўзбекистонга хориждан кириб келган фуқаролар орасида коронавирусга гумон қилинган беморлар аниқланмади

Санитария-эпидемиологик осойишталик агентлигининг “Янги турдаги короновирус аниқланган ўчоқларда дастлабки ва якуний дезинфекция тадбирлари тўғрисида” вақтинчалик услубий қўлланма ҳамда йўриқномалари ишлаб чиқилди. Бу ҳақда агентликнинг жамоатчилик билан алоқалар бўлими хабар берди.

Ушбу вақтинчалик кўлланма ва йўриқномалар Санитария-эпидемиологик осойишталик агентлиги тасарруфидаги республика миқёсидаги илмий тадқиқот институтлари, вилоят-шаҳар-туман санитария-эпидемиологик осойишталик марказлари, ҳудудий соғлиқни сақлаш бошқармаларига ижро учун юборилди.

Хабар берилишича, Ислом Каримов номидаги Тошкент халқаро аэропортига 31 январь куни хорижий давлатлардан 28 та самолёт қабул қилинган, 4658 нафар фуқаро санитария-карантин пунктларида термометриядан ўтказилган, шулардан 372 нафари Хитойда ўқийдиган талабалардир. Термометриядан ўтказилган фуқаролар орасида 1 нафар Россиядан учиб келган фуқарода тана ҳарорати юқорилиги аниқланган, гумон қилинган беморда ЎРВ касаллиги аниқланган. 

“Ўзбекистон темир йўллари” АЖ марказий СЭХга қарашли 6 та СКПдан жами 626 нафар фуқаро ўтган ва улар орасида тана ҳарорати кўтарилган беморлар анииқланмаган.

Тошкент вилоятининг “Ғишт-кўприк”, “Ойбек”, Сурхондарёнинг “Айратон”, “Гулбаҳор” ва Дарё порти ҳамда Андижон вилоятининг “Дўстлик” СКПлари орқали 655 та автотранспорт, 19344 нафар фуқаро ўтказилган, улар орасида юқумли касалликка гумон қилинган беморлар аниқланмаган. 

“Хитой Халқ Республикасида коронавирус инфекцияси бўйича кузатилаётган мураккаб эпидемик вазият, бу касалликни республика ҳудудига кириб келиши ва тарқалиб кетишининг олдини олиш борасида амалга оширилаётган профилактик тадбирлар Санитария-эпидемиологик осойишталиги агентлиги томонидан назоратга олинган”, дейилади хабарда.

1 февраль кунги маълумотларга кўра, Хитой Халқ Республикасида жами 11821 нафардан ортиқ киши касалланиб, 1795 нафар киши оғир ҳолатда даволанмоқда, 259 нафар киши ушбу касалликдан вафот этган.

Касалликка чалиниш ҳолатлари дунёнинг 22 та давлатда қайд этилган.

Аввалроқ Ўзбекистон Соғлиқни сақлаш вазирлиги коронавирус эпидемияси масаласида Жаҳон соғлиқни сақлаш ташкилотининг Тошкентдаги ваколатхонаси билан ҳамкорликда видеоселектор йиғилиши ўтказгани ҳақида хабар берилганди.