Японияда ҳам круиз лайнер карантинга олинди. Ундаги 10 кишида коронавирус аниқланган

«Даймонд принцесс» круиз кемаси 20 январь куни Йокогамадан чиқиб, Кагосима-Ҳонгконг-Окинава йўналишидан ўтиб, душанба куни қайтиб келган. Бу вақтга келиб бир неча одам тоби қочгани ҳақида шикоят қилган ва ҳукумат бортдаги барчани текширишга қарор қилган.

Япония Соғлиқни сақлаш, меҳнат ва фаровонлик вазирлиги чоршанба куни шифокорлар 10 кишида янги коронавирус сабаб бўлган пневмонияни аниқлашганини хабар қилди. Расмийларга кўра, вирус ҳонгконглик йўловчи томонидан юқтирилган бўлиши мумкин. 

Ташувчи компаниянинг хабар беришича, Японияга самолётда учиб келган 80 ёшли эркак 20-25 январь кунлари «Даймонд принцесс» бортида бўлган. Ҳонгконгда ундан коронавирус топилган. 

Ҳукуматдагилар хабар беришича, вирус ташхиси қўйилган кемадаги барча йўловчилар Канагава префектурасидаги касалхонага ётқизилган. 

«Даймонд принцесс» лайнери оператори ўз веб-сайтида хабар беришича, уч япон, Хитойнинг уч фуқароси, икки австралиялик ва АҚШнинг бир фуқароси, шунингдек, филиппинлик (экипаж аъзоси) тасдиқланган ташхис билан касалхонага ётқизилган. 

Япониянинг NHK телеканали хабарига кўра, тўрт кишининг ёши 50дан 60 ёшгача, яна тўрт нафари 60 ёшдан 70 ёшгача, бири 70 ёшдан, бошқаси 80дан ошган. Уларнинг ҳеч бирининг аҳволи оғир эмаслиги айтилган. 

Круиз компаниясининг маълумотларига кўра, «Даймонд принцесс» бортида жами бўлиб 2666 йўловчи ва экипажнинг 1045 аъзоси бўлган. Уларнинг қарийб ярми Япония фуқаролари, аммо лайнерда жами 56 мамлакатдан фуқаролар бор.

«Даймонд принцесс» оператори карантиндаги йўловчилар зарур бўлган барча нарсалар - озиқ-овқат, бепул интернет ва телефон билан таъминланишини таъкидламоқда.
Йўловчилардан бири твиттерда лайнерда бўлаётган воқеалар фотосуратлари ва видеоларини жойлаштирмоқда. 

I’d like to share what it’s like on board the Diamond Princess cruise. Please use this page to exchange info. #DiamondPrincess #coronavirus pic.twitter.com/wRLdy63suj

— だぁ(On board the Diamond Princess / 乗船中) (@daxa_tw) February 5, 2020

検疫は8階にいた #ダイヤモンドプリンセス pic.twitter.com/O5ka0jT5Ip

— だぁ(On board the Diamond Princess / 乗船中) (@daxa_tw) February 4, 2020

この時間になると誰も出歩いてないです。静寂です #ダイヤモンドプリンセス pic.twitter.com/tLlr2oh5pQ

— だぁ(On board the Diamond Princess / 乗船中) (@daxa_tw) February 4, 2020

Бунгача Японияда 2019-nCoV коронавирус инфекциясининг 20та ҳолати аниқланган эди. Улардан 17 нафари эпидемия бошланган Хитойнинг Ухань шаҳрида бўлишганида вирусни юқтиришган. 

5 февраль куни маълумотларига кўра, Хитойда 2019-nCoV инфекциясининг 24363 ҳолати аниқланди, 490 киши вафот этди, яна 23260 киши ушбу вирусни юқтирганликда гумонланмоқда. 

30 январь куни Жаҳон соғлиқни сақлаш ташкилоти пневмониянинг тарқалишини халқаро миқёсда фавқулодда ҳолат деб тан олганди.