Японияда карантинга қўйилган круиз лайнеридаги 61 кишида коронавирус аниқланди

Япониянинг Иокогама портида карантинга қўйилган Diamond Princess круиз лайнерида коронавирусдан касалланганлар сони ортди. Кемадаги яна 41 кишида коронавирус аниқланган.

Фото: REUTERS

Бу ҳақда Япония соғлиқни сақлаш вазирлиги маълум қилди. Аввалроқ круиз лайнеридаги 20 кишида коронавирус аниқлангани маълум қилинганди.

Вазирлик маълумотларига кўра, яна 41 кишида коронавирусга тест ижобий натижа берган. Барча касалланганлар Токиодаги тиббиёт муассасасига етказилади.

Diamond Princess 20 январда Япониянинг Иокогама шаҳридан Кагосима-Ҳонгконг-Окинава йўналиши бўйича икки ҳафталик круизга жўнаган. Саёҳат 4 февралда тугаши керак бўлган. Бироқ Ҳонгконгда тушган йўловчилардан бирида коронавирус аниқлангач, 3 февралда кема Йокогама портида барча йўловчиларни текшириш учун қолдирилган.

Айни вақтда кема бортида 2666 сайёҳ ва экипажнинг 1045 аъзоси қолмоқда. Кемага эгалик қилувчи Princess Cruises компаниясида таъкидланишича, Япония соғлиқни сақлаш вазирлиги кемани Йокогама портида 14 кунлик карантинда қолдиришни талаб қилган.

Тайёрлаган Шуҳрат Раҳимов

#Япония #круиз лайнери #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.