Япониядаги лайнерда карантин муддати тугамоқда, Хитойда 60 млн киши карантинда. Сўнгги маълумотлар

17 февраль куни АҚШ ушбу лайнер бортида бўлган фуқароларини эвакуация қилишга киришди. Кема бортида бўлган америкаликларнинг 328 нафари Токиодан икки рейс орқали АҚШга юборилди, аввалроқ 40 киши Япониядаги шифохоналарга жойлаштирилганди - уларда COVID-19 инфекцияси аниқланган. АҚШ Давлат департаменти маълумотига кўра, АҚШга олиб кетилганлар орасида 14 кишида ҳам сўнгги 2-3 кун мобайнида коронавирус аниқланган, улар Калифорниядаги базада 14 кун давомида карантин ҳолатида бўлишади.

Japan Times нашри маълумотига кўра бир қанча америкаликлар лайнерни тарк этишни истамаган. CNN хабарига кўра, улар қарийб икки ҳафталик карантиндан кейин яна янги карантинга жойлаштирилишларидан норози бўлишган. «Бу ҳеч бир айб қилмасдан қамоқда ўтиришга ўхшайди», — деган йўловчилардан бири Кери Мэнсикалко. 17 февраль кунги рейсларда АҚШга учишни истамаганлар, уйга қайтишдан олдин Японияда яна икки ҳафта ўтказиши керак бўлади.

Австралия ҳукумати «Даймонд Принцесс»дан 209 нафар фуқаросини эвакуация қилишни режалаштирган, уларнинг ҳеч бирида коронавирус инфекцияси аниқланмаган. Эвакуация 19 февраль куни, круиз лайнерда икки ҳафталик карантин муддати тугагач бошланади. Австралияга қайтарилгач бу одамлар яна карантинга жойлаштирилади. «Даймонд Принцесс» бортидаги австралияликларнинг 150 нафари 60 ёшдан катта кишилардир. Исроил ва Канада ҳам лайнердаги фуқароларини эвакуация қилмоқчи.

Бортда Буюк Британиянинг ҳам 78 фуқароси бор, аммо ҳозирча уларнинг эвакуация қилиниши тўғрисида хабар қилинмаган. Круиз лайнердаги британияликлар ҳукумат улардан воз кечган деб ҳисоблашмоқда. Бу йўловчилар ҳукуматни АҚШдан ўрнак олган ҳолда эвакуация жараёнини бошлашга чақиришмоқда. Буюк Британия Ташқи ишлар вазирлиги вакили эвакуация ҳақидаги саволга жавоб бера туриб, амалдорлар «бортдаги британияликлар соғлиги учун кун-у тун ишлашаётгани» ҳақида айтган. The Telegraph нашрида ёзилишича, британлар ватанга қайтиш ўрнига яна Япония ҳудудида карантин ҳолатида қолдирилиши мумкин.

Россия Федерацияси Ташқи ишлар вазирлиги кема бортида 24 нафар россиялик борлиги ва кемадаги карантин муддати якунланганидан кейингина эвакуация масаласи муҳокама қилинишини билдирган. Россиянинг Япониядаги элчихонаси маълумотига кўра, кемадаги россияликлардан бири коронавирус юқтириб олгани аниқланган. Қайд этилишича, бу аёл шифохонага ётқизилади ва даволаниш жараёнини ўтайди.

Петербургда 7 февраль куни коронавирус бўйича карантиндан қочиб кетган аёл - 32 ёшли Алла Ильина суд қароридан кейин мажбурий равишда касалхонага ётқизилди.

Сўнгги маълумотлар
Хитой ҳукумати Covid-19 эпидемияси ўчоғи бўлган Хубэй провинциясида карантин тартибларини қатъийлаштирган. 60 миллион кишига уйидан чиқиш тақиқланган.

16 февраль куни Хитойда коронавирус юқтирганларнинг яна 107 нафари ҳалок бўлди, шанба куни 139та ўлим ҳолати қайд этилганди. Мамлакатда эпидемия бошланганидан буён ҳалок бўлганлар сони 1771 нафарга етган. 

Бутун дунё бўйлаб вирусдан зарарланганлар сони 70 минг 620 нафарни ташкил қилмоқда. 10 мингга яқин киши касалликни енгиб ўтиб, тузалишга муваффақ бўлган.

Ҳукумат вирусдан зарарланиш ҳолатлари ва ўлимлар сони пасая бошлаганини маълум қилган - вирус тарқалиши назоратга олинган.

Ухандаги «Лэйшьэншань» касалхонаси бош шифокори Ван Сунхуань Хитойда коронавирус эпидемияси чекинаётганини айтган.

«Коронавирусга қарши курашда бурилиш даври аллақачон келди. Касалликка чалинганларнинг статистик маълумотларига келсак, рўйхатга олинган аксарият касалланишлар эса аввал аниқланган ҳолатларга тегишлидир. Иситмаси чиққан беморлар сони, менинг кузатишларимга кўра, кетма-кет бешинчи кун камаймоқда», деган у.

Вирус Хитойдан ташқари дунёнинг 26 давлатида аниқланган.

Хубэйда нималар бўлмоқда?

Хубэйда айни пайтдаги тартибларга кўра, бир оиланинг фақат бир аъзосига уч кунда бир марта зарур нарсалар - озиқ-овқат, дори-дармон ва гигиена воситалари хариди уйдан чиқишга рухсат берилган. Кўп қаватли биноларда яшовчи одамлар назорат-ўтказув пунктларидан ўтиши керак.

Дорихоналар, меҳмонхоналар, озиқ-овқат дўконлари ва поликлиникалардан ташқари барча корхоналар ва компаниялар ёпилган. Сотувчилар ва мижозлар қатъий тартибда ҳароратини ўлчатишади.

Номаълум муддатга хусусий транспорт воситалари, жумладан автомобиллар, мотоцикллар ва велосипедлардан фойдаланиш тақиқланган. Йўлда фақат хизмат машинаси ва  авто шошилинч хизматлар машиналари - тез тиббий ёрдам, ўт ўчириш машиналари ҳамда яшаш учун бирламчи воситаларни ташувчи машиналар ҳаракатига рухсат этилган.

Уханга қўшни бўлган ва 5 миллион аҳолиси бор Сяогань шаҳрида ҳам одамларга ўз уйларини тарк этиш тақиқланган. Бу шаҳарда одамларга яшаш учун биринчи навбатда керак бўладиган маҳсулотлар уйгача етказиб берилмоқда. Ҳукумат бу тартибни бузганларни 10 кунга қамаш ҳақида огоҳлантирган.

Пекинда шаҳарга ташқаридан келганларнинг барчасини икки ҳафталик карантинга мажбурий жойлаштириш тўғрисида фармойиш чиқарилган. Бунга амал қилмаганлар жазоланиши мумкин.

Вирусга қарши вакцина
16 февраль куни Чжэцзян провинциясида коронавирусга қарши курашда самарали бўлиши мумкин бўлган биринчи дори воситаси ишлаб чиқарила бошланди. 

Zhejiang Hisun Pharmaceutical фармацевтика компания ҳукуматдан коронавирусга қарши «Favipiravir» потенциал дори воситасини сотишни бошлаш бўйича рухсат олди. Дори сотувга чиққач, компания уни клиник синовдан ўтказишни давом эттириши керак бўлади.

Хитойнинг биотехнологик ишланмалар миллий маркази директори Чжан Синьминь бир нечта дорилар, жумладан, Remdesivir (ремдесивир), Япониянинг Favipiravir (Фавипивавир) дори воситалари коронавирусни даволашда юқори самара намойиш қилганини таъкидлаб ўтган. Шунингдек, мутахассис Хитой коронавирусдан вакцина ишлаб чиқилишини тезлаштириш учун турли технологик ёндашувлар қўллаётгани, бир қатор вакциналар эса ҳайвонларда синалиши бошланганини қўшимча қилиб ўтган.

Аввалроқ Жаҳон соғлиқни сақлаш ташкилоти бош ижрочи директори Сумия Сваминатан COVID-19 коронавирусига қарши вакциналарни инсонда синовдан ўтказиш тўрт-беш ойдан сўнг бошланишини маълум қилганди. Хитойнинг АҚШдаги элчиси эса коронавируснинг ҳарбий ихтироларга боғлиқлигини рад этган эди.

Бизнес қандай зарар кўрмоқда?
Хитой марказий банки нақд пулдан фойдаланувчилар хавфсизлигини ошириш мақсадида муомалага янги банкноталарда 600 млрд юан чиқарган ва қўлланишда бўлган пуллар дезинфекция қилиниб, 7 кундан 14 кунгача карантинга қўйилмоқда.

Коронавируснинг бизнесга таъсири Япония ва Сингапур каби давлатлар иқтисодиётида ҳам акс этмоқда. Бу эпидемия туристлар ва етказмалар оқимига жиддий таъсир кўрсатгани билан боғлиқ.

Хитой янги йили байрамидан кейин барча ишга қайтиши керак эди, аммо эпидемия туфайли корхоналар ҳувиллаб қолди - смартфонлар ишлаб чиқаришдан тортиб автомобилларга эҳтиёт қисмлар тайёрланадиган заводларгача.

Ҳонгконгда ваҳима
Ҳонгконг шаҳрида коронавирус туфайли бирламчи эҳтиёж маҳсулотларининг етишмаслигидан ваҳимага тушган қуролланган босқинчилар қиймати 1695 Ҳонгконг доллари (218 АҚШ доллари)га тенг бўлган ҳожатхона қоғозларини ўғирлаб кетди.

Полиция маълумотига кўра, пичоқлар билан қуролланган уч талончи Вонкок тумани ҳудудида Wellcome супермаркети олдида танқис ҳожатхона етказиб берувчини тунашган.

Ҳуқуқ-тартибот органлари ходимлари жиноятни «иссиқ изи»дан фош этишган ва икки кишини қўлга олишган, улардан йўқолган ҳожатхона қоғозларининг бир қисми мусодара қилинган.

Apple Daily нашри хабарига кўра, жиноятчилар жами 600 ўрам қоғозни ўғирлашганди.

Шаҳардаги дўконларда ушбу маҳсулот танқислиги юзага келган, ҳожатхона қоғозининг янги партияси келган вақтда дўконлар олдида узун навбатлар ҳосил бўлмоқда.

Маҳаллий ҳукумат аҳолини эпидемия ҳожатхона қоғозини етказиб беришга таъсир кўрсатмаслигига ишонтиришга уринмоқда, Ҳонгконг Истеъмолчилар кенгаши бош директори ҳам нам иқлим шароитида моғорлаб кетиши мумкинлиги сабабли маҳаллий аҳолига ҳожатхона қоғозини жуда кўп сотиб олмасликни ва уйида жуда кўп миқдорда сақламасликни тавсия этган, аммо одамлар барибир бу маҳсулотни ғамлаб қўйишни маъқул кўришмоқда.

Одамлар гуруч, макарон маҳсулотлари ва тозалаш воситаларини ҳам улгуржи сотиб олишга киришган.

Айни вақтда шаҳардаги дўконларда юз учун ҳимоя ниқоблари ва дезинфекция воситаларини топиб бўлмайди.

Ҳонгконгдан ташқари Сингапурда ҳам ҳожатхона қоғозлари, тозалаш воситалари ва юз учун тиббий ниқоблар кўтарасига сотиб олиниши оқибатида маҳсулотлар тақчиллиги кузатилмоқда. Бу мамлакатда коронавирусдан зарарланиш билан боғлиқ 75та ҳолат қайд этилган.