Коронавирус: Москвада юқори шайлик режими, Санкт-Петербургда талабалар карантинда

Москва мэри Сергей Собянин Россия пойтахтида коронавирус тарқалишининг олдини олишга қаратилган янги чоралар ҳақида эълон қилди. Инструкцияда хориждан қайтиб келганлар биринчи навбатда нималар қилиши ва қандай ҳолатларда ўзини изоляция қилиши зарурлиги кўрсатилган.

Бу чоралар шаҳарда коронавирус тарқалиши хавфи сабаб юқори шайлик режими жорий этилгани билан боғлиқ. Кўриладиган чоралар рўйхати Москва мэрияси сайтида жойлаштирилган.

Фармонда кўрсатилишича, Хитой, Жанубий Корея, Италия, Эрон, Франция, Германия ва Испанияга бориб қайтган фуқаролар автоматик равишда 14 кун давомида ўзларини уй шароитида мустақил изоляция қилиши керак — улар ишга, ўқишга ва жамоат жойларига боришдан тийилишлари лозим.

Коронавирус тарқалган бошқа давлатлардан қайтиб келганлар ҳам бу ҳақда ҳукуматни хабардор қилиши керак. Бундай фуқаролар Россияга қайтиб келганликлари ҳақида хабар бериши ва ўзларининг телефон рақамларини қолдиришлари лозим. 

Агар «илк респиратор симптомлар» кузатилса, шифокорга бориш керак эмас, балки уйда туриб тиббий ёрдамга мурожаат қилиш зарур бўлади. Агар шифокор изоляция режими тайинласа, унга амал қилиш керак.

Шунингдек, иш берувчиларга ўз ходимларининг тана ҳароратини иш жойида ўлчаш, кимда юқори ҳарорат аниқланса, ишдан четлатиш чорасини кўриш мажбурияти юкланган. Иш берувчи зарур ҳолатда ходимларига уй шароитида мустақил изоляция режимини таъминлашга ёрдам кўрсатади.

Шу билан биргаликда, Собяниннинг фармони матнида, кўрсатмаларга амал қилмайдиган фуқаролар ва иш берувчилар қандай жавобгарликка тортилиши борасида аниқлик киритилмаган, шунингдек, ушбу фармон эълон қилинишидан аввалроқ инфекция ўчоқларидан қайтганлар қандай бунга риоя қилишлари кераклиги ҳам эслаб ўтилмаган

Сергей Собяниннинг сайтида ёзилишича, Москвада айни вақтда умумий вазият нисбатан тинч.

Россиянинг Санкт-Петербург шаҳрида эса Мечников номидаги давлат шимоли-ғарбий тиббиёт университетининг 700 нафардан ортиқ талабаси карантинга олинди. Бунга италиялик талабада коронавирус кузатилгани сабаб бўлган.

Италиялик талабанинг ҳарорати кўтарилгач, тезкор чоралар кўрилган ва у Боткин номидаги касалхонага жойлаштирилган.

Айни вақтда карантинга олинган ҳудуд ичкарисига одамлар киритилмаяпти.

Италиялик талаба билан бирга ётоқхонада яшаган бошқа ёшлар ҳам карантинга олинган. Талабалар ётоқхоналарида яшовчилар ОТМ талабаларининг 20 фоиз қисмини ташкил этади.

Рикардо исмли талаба 29 февралда Санкт-Петербургга келганди. Аэропортда унинг тана ҳарорати ўлчанганида иситмаси бўлмаган. Талабадаги касаллик аломатлари орадан бир неч кун ўтгач кўзга ташланган, шундан сўнг у ва уни кутиб олган бошқа талабалар касалхонага олиб кетиб текширилган.

Петербург иқтисодий форуми ташкилотчилари коронавирус тарқалиши хавфи туфайли 3-6 июнь кунларига белгиланган иқтисодий форумни бекор қилди. 1997 йилдан буён ҳар йили ўтказиб келинаётган форумга сўнгги йилларда ҳар йили 10 мингдан ортиқ киши, жумладан, турли давлатлардан юқори мартабали сиёсатчилар ташриф буюриши кузатилаётганди.

Зеленскийнинг ташрифи
Украина президенти Владимир Зеленский Полтава областидаги Нових Санжар (Нові Санжари) посёлкасига келди ва Хитойдан эвакуация қилиниб, карантинга жойлаштирилган 72 киши билан учрашди. Пайшанба куни бу ердаги санаторияда 14 кунлик карантин муддати тугади.

Президент офиси сайтида айтилишича, бу давр мобайнида эвакуация қилинганларнинг ҳеч бирида коронавирус аниқланмаган ва улар энди оддий ҳаёт тарзига қайтишлари мумкин.

21 февраль куни Нових Санжар аҳолиси эвакуация қилинганлар бу ҳудудга жойлаштирилишига қарши намойиш ўтказган ва ҳатто карантинга олиб кетилаётган украинлар ўтирган автобуслар йўлини тўсишганди. Аммо кейинроқ, маҳаллий нашрларнинг ёзишича, одамлар санаторияга ўйинчоқлар ва ширинликлар келтира бошлашган.

• 6 март куни ҳолатига кўра бутун дунёда коронавирус инфекциясига чалинганлар сони 98 467 нафарни ташкил этмоқда. Вафот этганлар сони 3401 нафар, 55 189 киши соғайган. Вирус жаҳоннинг 88 мамлакатида қайд этилган.

АҚШ: яна бир круиз лайнер карантине, Калифорнияда фавқулодда ҳолат
Калифорния қирғоқлари яқинида «Гранд принцесс» круиз лайнери карантинга олинди, аввалги рейс йўловчиларидан бири - 21 февраль куни Сан-Францискода кемадан тушган шахсда коронавирус аниқланган.

71 ёшли эркак чоршанба куни Сакраментодаги клиникада вафот этди. Хабар қилишларича, у коронавирусдан зарарланишидан олдин бошқа касали бўлган.

Бу Калифорнияда Covid-19 хасталигидан илк ўлим ҳолати бўлди, айни вақтда АҚШда вирус қурбонлари сони ўн бир кишини ташкил этмоқда. Бу маълумотдан кейин Калифорния губернатори Гэвин Ньюсом штатда фавқулодда ҳолат эълон қилди.

«Гранд принцесс» круиз лайнери февраль ойида Японияда уч ҳафтага яқин вақт давомида карантин ҳолатида тутиб турилган «Даймонд принцесс» сериясига мансуб бўлиб, у ҳам Carnival компаниясига тегишли ҳисобланади. Бу кема 21 февраль куни Мексикадан қайтган, кўп ўтмай Ҳавайига йўл олганди.

Аввалги круиз йўловчиларидан бирида Covid-19 аниқлангач, бу рейс тўхтатилган, кема Калифорния қирғоқлари яқинида очиқ сувда карантин ҳолатига ўтказилган

Лайнер бортида иккита круизга ҳам - Мексика ва Ҳавайига чипта олган 62 киши бор. Бу йўловчилар ўз каюталарида изоляция қилинган, қолган йўловчилар эса кема бўйлаб эркин ҳаракатланишлари мумкин.

Марк Пэйс ва унинг рафиқаси Бет CNN телеканалига йўловчиларнинг кўпчилик қисми учун ягона карантин чораси - буфетда тарелкани ювилмаган қўл билан ушламаслик ва ўзига овқат солмаслик экани ҳақида айтишган.

Марк Пэйснинг сўзларига кўра, у круизга отланар экан, ўзи билан лэптоп ва икки ҳафтага ўзи ҳамда рафиқаси учун етарли бўлган дори-дармонлар олган - у карантин эҳтимолини ҳисобга олган.

Тиббиёт ходимлари «Гранд принцесс»нинг 11 йўловчиси ва экипажнинг 10 аъзосини коронавирус юқтиришда гумонламоқда.

АҚШда вирус билан боғлиқ вазият
Бунгача коронавирус келтириб чиқарган Covid-19 пневмонияси оқибатида 10 нафар америкалик вафот этган, бу ўлимларнинг барчаси мамлакат шимоли-ғарбидаги Вашингтон штатида қайд этилганди.

Мамлакатнинг 16та штатида жами 150 киши вирусдан зарарланган, уларнинг аксари Вашингтон, Техас ва Небраска штатларига тўғри келади. Учта штатда фавқулодда ҳолат жорий этилган: Вашингтон, Флорида ва Калифорния.

Федерал ҳукумат мамлакатга сўнгги 14 кун мобайнида Хитой ҳудудида бўлган хорижликлар киришини тақиқлаган.

Президент Дональд Трамп томонидан коронавирус тарқалишига қарши курашга масъул этиб тайинланган вице-президент Майк Пенс чоршанба куни мамлакатнинг ҳар бир фуқароси коронавирусни аниқлаш тестидан ўтиш имкониятига эга бўлиши кераклигини таъкидлади. Шу муносабат билан АҚШ Касалликларни назорат қилиш ва профилактика маркази қатор бюрократик чекловларни бекор қилди - бундан мақсад тадқиқотлар ўтказиш жараёнини тезлаштиришдир.

Оқ уй маъмуриятини танқид қилувчилар лаборатория материаллари ва тиббий ходимлар етарли эмаслиги, шунингдек, текширувлар учун юқори ҳақ олиниши (минг долларгача) ҳолатларига эътибор қаратишган. 

Вакиллар палатаси чоршанба куни коронавирусга қарши курашдаги фавқулоддаги чоралар учун 8,3 млрд доллар маблағ ажратиш учун овоз беришди.

United Airlines ва Delta авиакомпаниялари талаб пасайгани туфайли ички рейсларни қисқартирган.

Коронавирус: жаҳонда нималар бўлмоқда?

• Буюк Британияда илк ўлим ҳолати қайд этилди. Беркшир графлигидаги шифохонада аввалроқ бошқа касаллиги ҳам бўлган кекса бемор коронавирусга чалиниши оқибатида вафот этган. Мутахассисларнинг ҳисоблашича, у Буюк Британия ҳудудида коронавирус юқтирган. Айни вақтда қироллик ҳудудида 115 кишида коронавирус қайд этилган.
• Сўнгги бир кун ичида Хитойда вирусдан зарарланишнинг 143та янги ҳолати аниқланган, 31 киши вафот этган.
• Жанубий Кореяда пайшанба куни яна 518 кишида касаллик аниқланган ва айни вақтда мамлакатда вирусдан зарарланганлар сони 6284 нафарга етган. 42 киши вирус қурбонига айланган.
• Австралия сўнгги икки ҳафта мобайнида Жанубий Корея ҳудудида бўлган хорижликлар учун ҳам чегарани ёпди. Яшил қитъада бугунги кунга келиб вирусдан зарарланишнинг 59та ҳолати ва икки ўлим ҳолати қайд этилган.
• Италияда мамлакатдаги барча мактаблар 10 кун муддатга ёпилган. Апеннин яриморолида вирусдан зарарланганлар сони 3858 нафарга етган, 5 март куни яна 41 киши вирус қурбони бўлган - бу мамлакатда бугунга қадар жами 148 киши вирусга чалиниши оқибатида вафот этган.
• Халқаро валюта фонди коронавирусдан жиддий зарар кўрган давлатлар учун 50 миллиард доллар миқдоридаги маблағни ёрдам сифатида ажратади, ташкилот 2020 йилда коронавирус туфайли жаҳон бўйича иқтисодий ўсиш кўрсаткичи 2019 йилдагига қараганда 2,9 фоизга паст бўлишидан огоҳлантирган.
• Вирус яна 6 мамлакатда аниқланган: Жанубий Африка Республикаси, Босния ва Герцеговина, Гибралтар, Венгрия, Словения ва Фаластин мухторияти. Айни вақтда вирус қайд этилган мамлакатлар сони 88тани ташкил этмоқда.
• Эронда коронавирус инфекцияси билан оғриганлар сони бир сутка ичида 1234 кишига ошди ва беморларнинг умумий сони 4747 кишини ташкил этмоқда. Қурбонлар сони ҳам 17 нафарга ошган ва 124 нафарга етган.