Россияда иқтисодиётни қўллаб-қувватлаш чораларининг иккинчи пакети тайёрланмоқда

Кичик ва ўрта бизнесга маош тўлаш ва бошқа зарур эҳтиёжлар учун қисқа муддатли мақсадли заём ва кредитлар бериш таклиф этилмоқда.

Фото: Wikipedia

Россия ҳукумати коронавирус тарқалиши оқибатларига қарши қаратилган чораларнинг иккинчи пакетини тайёрламоқда. Бу ҳақда мамлакат бош вазири Михаил Мишустин маълум қилди.

Маълум қилинишича, ҳукумат қуйидаги чораларни кўришни режалаштирган:

Регионал бюджетларни қўллаб-қувватлаш. Федерал бюджетда реструктуризация ва бюджет кредитлари тўловини кечиктиришни тақдим этиш ҳамда регионал бюджетларга компенсация бериш учун 171 млрд рубль захира тўпланди.

Бандликни қўллаб-қувватлаш. Кичик ва ўрта бизнесга маош тўлаш ва бошқа зарур эҳтиёжлар учун ВЭБ кафолати остида қисқа муддатли мақсадли заём ва кредитлар бериш таклиф этилмоқда. Бунга 150 млрд рубль ажратиш режалаштирилмоқда.

Регионлар ва муниципалитетларга ижарага берувчилар учун ижара нархини камайтириш ёки кечиктириш эвазига мулк солиғини пасайтириш тавсия қилинади. Шу билан бирга, коронавирус тарқалишига қарши курашиш бўйича чоралар ижара шартномасида форс-мажор ҳолати сифатида кўрилиши мумкин.

Энг кўп зарар кўраётган соҳалардаги кичик ва ўрта бизнес субъектлари уй-жой коммунал хизматлари тўловларини кечиктиргани учун жарима ва пеняларни вақтинча тўламаслик имкониятига эга бўлади. Қарздорлик пайдо бўлганида уларга уй-жой коммунал хизмат кўрсатилишини тўхтатиш тақиқланади.

Аввалроқ Россия президенти Владимир Путин ҳукуматга фавқулодда вазият режимини киритиш ваколатини берувчи қонунни имзолагани хабар қилинганди.

Тайёрлаган Дилшод Аскаров

#Россия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.